«Úrker» men «Tumar» syılyqtaryna «Sheteldegi qazaqtildi BAQ» nomınatsııasyn qosý usynyldy

NUR-SULTAN. QazAqparat – «Otandastar qory» KeAQ vıtse-prezıdenti Maǵaýııa Sarbasov sheteldegi qazaqtildi BAQ-ty qoldaý máselelerin kóterdi, dep habarlaıdy QazAqparat tilshisi.

«QR Aqparat jáne qoǵamdyq damý mınıstrligi arqyly elimizde jyl saıyn uıymdastyrylatyn «Úrker» ulttyq syılyǵy men «Tumar» ulttyq televızııalyq syılyǵyna sheteldegi qazaqtildi BAQ-qa arnalǵan jeke nomınatsııa taǵaıyndaýdy usynamyz. Byltyr «Otandastar qorynyń» usynysymen «Úrker» syılyǵy aıasynda «QazAqparattyń» 100 jyldyǵyna arnalǵan 1 mıllıon teńgelik syılyq Mońǵolııadaǵy «Kaznews.mn» saıtyna berildi. Endi osy ulttyq syılyqtardyń bir nomınatsııasy jyl saıyn turaqty túrde sheteldegi qazaqtildi BAQ ókilderine berilip otyrýyn suraımyz», - dedi M. Sarbasov Otandastar qory janyndaǵy qoǵamdyq komıssııa otyrysynda.

Sonymen birge 2021 jyly sheteldegi qazaqtildi BAQ-tyń birlestigi qurylmaq. Osy birlestik arqyly jylyna bir ret álemdegi qazaqtildi BAQ ókilderiniń plenarlyq otyrysyn ótkizip, ózekti máselelerdi talqylap, ózara tájirıbe men aqparattyq ónimder almasý usynyldy.

«Aqparat komıtetiniń málimetinshe, «Qazaq TV» telearnasy 120 eldegi spýtnıktik jáne kabeldi telearnalarǵa qosylǵan. Kórshi Reseıde 39 kabeldi toptamaǵa, al «Habar 24» telearnasy aqyly kabeldi arnalardyń 30 operatorlyq toptamasyna engizilgen. Sheteldegi etnıkalyq qazaqtar tarapynan «Qazaq TV» jáne «Habar 24» telearnalarynan atamekenge kóship kelip jetistikke jetken, úlgi alatyn qandastar týraly tanymdyq, taǵylymdyq baǵdarlamalar, qazaq tili men dombyra tartýdy úıretetin jáne taǵy basqa arnaıy habarlar ashylsa degen usynystar men ótinishter kóptep túsýde», - deıdi Maǵaýııa Sarbasov.

Buǵan deıin spıker sheteldegi qazaqtildi BAQ-ty qoldaý máselelerin kótergen edi.

https://kaz.inform.kz/news/shet-elderde-kazak-tilinde-kansha-bak-bar_a3763587