«Úrker-2017» ulttyq syılyǵyna ótinimderdi qabyldaý merzimi uzartyldy
ASTANA. QazAqparat - Baspasóz, radıo, ınternet-jýrnalıstıka salasyndaǵy «Úrker-2017» ulttyq syılyǵyna qatysý týraly ótinimderin qabyldaý merzimi 2017 jyldyń 7 maýsymynan 10 maýsymǵa deıin uzartyldy, dep habarlaıdy «QazAqparat» HAA tilshisi.
Bul týraly baıqaýdy uıymdastyrýshy - «Qazkontent» AQ basqarma tóraǵasy Evgenıı Kochetov Ortalyq kommýnıkatsııalar qyzmetinde ótken baspasóz máslıhatynda málimdedi.
Evgenıı Kochetovtyń aıtýynsha, 2017 jyldyń 7 mamyrynan búginge deıin baspasóz, radıo jáne ınternet-jýrnalıstıka ókilderinen baıqaýǵa qatysý týraly 300-den astam ótinim qabyldanǵan. Ótinimderdiń basym kópshiligi «Úzdik suhbat», «Úzdik fotosýret», «Úzdik reportaj» atalymdary boıynsha túsýde. Al «Jýrnalıstıkadaǵy debıýt», «Úzdik respýblıkalyq baspa basylym», «Úzdik jyl jýrnaly», «Úzdik óńirlik baspa basylym», «Qaznettegi medıaserpin» nomınatsııalary boıynsha úmitkerler sany az bolyp otyr.
«Bizdiń keıbir jýrnalıster baıqaýǵa ózderin-ózderi usynýǵa uıalady. Mundaı jaǵdaıda ony áriptesteri nemese ujymy usyna alady. Tuńǵysh ulttyq syılyq bolǵandyqtan, jeńimpazdardyń esimi tarıhta qalady. Sondyqtan, ýaqytty ozdyrmaı, erterek ótinim bereıik jáne talantty adamdar tasada qalyp qoımaý úshin, áriptesterimizge qoldaý bildireıik», - dedi «SERPIN» bilim berý uıymdarynyń ulttyq qaýymdastyǵynyń tóraǵasy Murat Ábenov.
Eske sala ketsek, mamyr aıynyń basynda QR Aqparat jáne kommýnıkatsııalar mınıstri Dáýren Abaev jýrnalısterdi Baspa, radıo jáne ınternet jýrnalıstıka salasyndaǵy tuńǵysh «Úrker» ulttyq syılyǵyna qatysýǵa shaqyrǵan edi.
Baıqaýǵa qatysý týraly ótinimder 7 mamyr men 10 maýsym aralyǵynda El.kz saıty arqyly qabyldanady. Usynylǵan dúnıelerdi belgili qoǵam qaıratkerleri, zııaly qaýym ókilderi men kásibı jýrnalısterden quralǵan qazylar alqasy sarapqa salady.
Baıqaý jeńimpazdary estelik músinshe men 1 000 000 teńgeni quraıtyn aqshalaı syılyqqa ıe bolady.
Marapattaý rásimi baılanys jáne aqparat qyzmetkerleriniń kásibı merekesi 28 maýsym kúni ótedi.
