«Úrker-2017» ulttyq syılyǵyna ótinimderdi qabyldaý bastaldy

ASTANA. QazAqparat - Baspasóz, radıo jáne ınternet-jýrnalıstıka salasyna arnalǵan «Úrker-2017» ulttyq syılyǵyna ótinimderdi qabyldaý bastaldy, dep habarlaıdy QazAqparat tilshisi. 

Syılyq quryltaıshysy Qazaqstan Respýblıkasy Aqparat jáne kommýnıkatsııalar mınıstrligi. Uıymdastyrýshy - «Qazkontent» AQ.

Syılyq kelesi atalymdar boıynsha beriledi:

1) úzdik fotosýret;

2) úzdik reportaj;

3) úzdik taldamalyq materıal;

4) úzdik jýrnalıstik zertteý;

5) úzdik suhbat;

6) Qazaqstan týraly úzdik tanymdyq materıal;

7) úzdik halyqaralyq taldamalyq materıal;

8) jýrnalıstıkadaǵy debıýt;

9) úzdik radıobaǵdarlama;

10) úzdik óńirlik radıostantsııa;

11) úzdik óńirlik merzimdi basylym;

12) úzdik mamandandyrylǵan merzimdi basylym;

13) úzdik jyl jýrnaly;

14) Qaznettegi medıaserpilis;

15) úzdik respýblıkalyq merzimdi basylym.

Baıqaýǵa jýrnalıstıkany kásip etken, baspasózde, ınternet-saıtta nemese radıoarnada jarııalanyp nemese eńbek etip júrgen kez kelgen maman qatysa alady.

Usynylǵan dúnıelerdi belgili qoǵam qaıratkerleri, zııaly qaýym ókilderi men kásibı jýrnalısterden quralǵan qazylar alqasy sarapqa salady.

Laýreattar estelik músinshe men qomaqty qarjylaı syılyqqa ıe bolady. 

Baıqaýǵa qatysý týraly ótinishter 7 mamyr - 7 maýsym aralyǵynda elektrondy túrde (qosymshadaǵy formaǵa sáıkes toltyrylyp, qol qoıylǵan skan-nusqasymen) ózin-ózi usyný formatynda el.kz ınternet-resýrsyndaǵy arnaıy bólimde nemese [e-mail] elektrondyq poshtasy arqyly qabyldanady.