Úrimjide Shyńjań qazaqtarynyń kezekti aqyndar aıtysy ótip jatyr
ASTANA. Maýsymnyń 17-si. QazAqparat /Rızabek Núsipbekuly/ - Qytaıdaǵy qandastarymyz arasynda 5 jylda bir ret ótkiziletin Shyńjań-Uıǵyr avtonomııalyq ólkesiniń 3-shi kezekti aqyndar aıtysy keshe Úrimji qalasynda saltanatpen bastaldy,
dep habarlaıdy QazAqparat Qytaıdyń «Táńirtaý» saıtyna silteme jasap.
Aqyndar aıtysynyń ashylý rásimine, Shyńjań-Uıǵyr avtonomııalyq ólkesiniń tóraǵasy Nurbákir qatysyp, sóz sóıledi.
Qytaı elindegi bir jarym mıllıonnan astam qandastarymyz úshin, «Aqyndar aıtysy» syndy dara ónerdiń alatyn orny bólek. Qazaqtar turatyn oblys, aımaq, aýdandarda túrli dárejedegi aqyndar aıtysyn ár jyl saıyn ótkizip otyrý dástúrge aınalǵan. Al memlekettik dárejedegi 5 jylda bir ret ótetin bul jolǵy alaman aıtysqa Shyńjańnyń ár túkpirindegi qazaqtar qonystanǵan oblys, aımaqtar jáne Gansý ólkesiniń Aqsaı qazaq avtonomııaly aýdanynyń aqyndary qatysady. Aıtys alamanynda ár jerden saralanyp jiberilgen 48 aqyn baq synamaq. Sonymen birge osy kezekti aqyndar aıtysyna oraılastyryp, «Aıtys zertteý memlekettik ǵylymı talqy jıynyn» ótkizý de josparǵa engizilgen.
Qazaq halqynyń aqyndar aıtysy 2006 jyly Qytaıdyń memlekettik deńgeıdegi mádenı muralardy qorǵaý tizimine kirgen bolatyn.
