Úrimjide Qazaqstan men Qyrǵyz azamattary birlese Naýryzdy toılady
BEIJІŃ - ÚRІMJІ. QazAqparat - Shyńjań-Uıǵyr avtonomııalyq ólkesindegi Úrimji qalasynda 200-den astam Qazaqstan men Qyrǵyzstan azamattary, stýdentter men kásipkerler, qazaq dıasporasynyń ókilderi Naýryz merekesin toılady, dep habarlaıdy Qytaıdaǵy «QazAqparat» HAA menshikti tilshisi.
Sharany Úrimji qalasyndaǵy QR Tólqujat-vızalyq qyzmetiniń qoldaýymen Qytaıdaǵy qazaqstandyq stýdentterdiń shyńjańdyq bólimshesi uıymdastyrdy.
Stýdentter kontsert qoıdy. Kórermenderge qazaq ánder men kúıleri jáne bıleri usynyldy. Qonaqtar kórip qana qoımaı, arqan tartý jáne ózge de qazaqtyń ulttyq oıyndaryna qatysty, Naýryz kójeden dám tatty.
Eske sala ketsek, 25 naýryzda osy qalada qazaqstandyq stýdentter Qazaqstan, Qyrǵyzstan jáne Qytaıdan 8 komandanyń qatysýymen shaǵyn fýtbol uıymdastyrǵan bolatyn.
Qytaıda Naýryzdy toılaý ShYU aıasynda 21 naýryzda bastaldy. Sol kúni Beıjińdegi qazaq dıasporasy merekelik kontsert qoıdy. 23 naýryzda Azerbaıjan, Qazaqstan, Qyrǵyzstan, Tájikstan, Túrikmenııa jáne Ózbekstan ókilderi birlesip merekelik shara uıymdastyrdy.
Al 30-31 naýryzda elimizdiń jastary Gonkong, Sıan jáne Shanhaıda teatrlandyrylǵan shoý jáne kontsertpen atap ótti.
