Úrimji qalasynyń barlyq aýdandary koronavırýs saldarynan «áskerı ýaqyt rejımine» aýysty

BEIJІŃ. QazAqparat – Shyńjań-Uıǵyr avtonomııaly aımaǵynyń (ShUAA) bıligi koronavırýstyń qaıta órshýi saldarynan ótken senbi kúni avtonomdyq aımaqtyń ortalyǵy Úrimji qalasynyń barlyq aýdandarynda «áskerı ýaqyt rejımin» engizdi, dep habarlaıdy QazAqparat jergilikti BAQ-qa silteme jasap.

«Ótken táýlikte (2020 jyldyń 18 shildesindegi saǵat 24:00-degi jaǵdaı boıynsha) Shyńjań-Uıǵyr avtonomııaly aýdanynda (Shyńjańdaǵy óndiristik-qurylys korpýsyn esepke alǵanda) koronavırýs juqtyrýdyń jańa 13 oqıǵasy men aýrý belgileri joq 18 adam anyqtalǵan. Barlyq oqıǵalar Úrimshi qalasynda tirkelgen», - delingen QHR ShUAA Densaýlyq saqtaý isteri jónindegi komıtettiń málimdemesinde.

«Qazirgi kezde Úrimji qalasy «koronavırýstyń qaıta órshýi sebebimen «áskerı ýaqyt rejımine» ótti, qoǵamdyq is-sharalardyń barlyq túri toqtatylǵan, aýdandarda qatań baqylaý júrgizilýde», - delingen «Jenmın Jıbao» basylymynyń mıkroblogynda.

Úrimji turǵyndaryna erekshe qajettilik bolmasa qaladan shyǵýǵa tyıym salyndy. Eger mundaı qajettilik týyndasa, koronavırýsqa test tapsyrý qajet. Úrimji qalasynda koronavırýstyń órshýine baılanysty onda áýe jáne avtobýs tasymaly qysqartyldy.

QHR Densaýlyq saqtaý isteri jónindegi memleketttik komıteti jalpy sany 200 adamnan turatyn 10 medıtsınalyq brıgada quryp, ony Úrimji qalasynda jergilikti turǵyndardy koronavırýsqa testileýge kómek kórsetý úshin jibermek.

Jalpy alǵanda, jeksenbi kúngi málimetter boıynsha, Shyńjańda koronavırýstyń jańa órshýi kezinen beri avtonomııaly aýdanda vırýsty juqtyrýdyń 30 rastalǵan oqıǵasy jáne aýrý belgilerinsiz júrgen 41 adam tirkelgen. 2,7 myńnan astam adam medıtsınalyq baqylaýda.

Eske sala ketsek, Shyńjańda jańa koronavırýstyń órshýine deıin avtonomııalyq aımaqta COVID-19 vırýsynyń jańa oqıǵalary 149 kún tirkelmegen edi.