Úreı – vırýstan da qaýipti – Amantaı Jumaǵalıev
ATYRAÝ. QazAqparat – Tótenshe jaǵdaıǵa baılanysty koronavırýstan saqtaný sharalary kúsheıtildi. Eń bastysy, turǵyndar úreıge, saryýaıymǵa boı aldyrmaı, sabyrlyq tanytyp, saqtaný sharalaryn qatań saqtaýǵa kóńil bólgeni jón. Óıtkeni, úreı – vırýstan da qaýipti. Osylaı degen Atyraý oblystyq Taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Amantaı Jumaǵalıev óńirdegi maskamen qamtý máselesi týraly aıtyp berdi, dep habarlaıdy QazAqparat.
- Bul koranavırýs ınfektsııasynan qalaı qorǵanýǵa bolady?
– Qazir turǵyndardyń medıtsına maskasyna suranysy artqanynan habardarmyz. Óıtkeni, olar betperdeni koronavırýstan qorǵanýdyń birden-bir joly dep túsinedi. Shyndyǵynda, betperde qorǵanysh quralynyń biri ekeni daýsyz. Medıtsınalyq maska aldymen, vırýsqa shaldyqqan adamdarǵa jáne naýqastarmen tikeleı jumys isteıtin dárigerlerge asa qajet. Vırýsty kóz, qulaq, tipti jýylmaǵan qol arqyly juqtyrýǵa bolady. Sondyqtan, elimizde engizilgen tótenshe jaǵdaıǵa baılanysty koronavırýstan saqtaný sharalary kúsheıtildi. Eń bastysy, mundaıda úreıge, saryýaıymǵa boı aldyrmaı, sabyrlyq tanytyp, saqtaný sharalaryn qatań saqtaýǵa kóńil bólgeni jón. Óıtkeni, úreı – vırýstan da qaýipti.
– Qazir Atyraýdaǵy dárihanalarda medıtsınalyq maskanyń qanshasy bar?
– Bizdiń departament kún saıyn oblystyń dárihanalaryndaǵy medıtsınalyq maska bar-joqtyǵyna monıtorıng júrgizedi. Farmatsevtıka naryǵyndaǵy kásipkerlerge halyqtyń suranysyn qamtamasyz etý maqsatynda medıtsınalyq maska qoryn ýaqytyly tolyqtyrý týraly túsindirý jumystary júrgizilýde. Qazir oblys ortalyǵynda 2 myń jıyntyq bir rettik qoldanylatyn maska bar. Maskalar Atyraý qalasy mańyndaǵy Tomarly selosynda ornalasqan «Igi sát» ǵımaratyndaǵy dárihanada men Jeruıyq móltekaýdanyndaǵy «Zıbash» dárihanasynda satylýda. Sondaı-aq, «Medfarm ımport» JShS men «QazTehIndýstrııa» kompanııasym arasynda 100 myń dana kóp rettik qoldanatyn maska alý úshin kelisimshart jasaldy. Kelisimshartqa sáıkes Atyraýǵa maskanyń 50 myń danasyn 20 naýryzda jetkizý kózdelip otyr.
– Medıtsınalyq maskany 3-4 saǵat saıyn aýystyrý qajet. Osyǵan oraı onyń baǵasyn qoljetimdi etýge bolmaı ma?
– Bizdiń departamenttyń quzyreti sheginde tek dárilik zattardyń baǵasyn memlekettik retteýdi júzege asyrady. Al, maska medıtsınalyq buıym bolǵandyqtan, bizdiń departament onyń baǵasyn rettemeıdi.
