Úreı týdyratyn otandyq tuńǵysh fılm prokatqa shyǵady
ALMATY. QazAqparat - Horror janryndaǵy qazaqstandyq tuńǵysh fılm prokatqa shyǵýǵa daıyn. «Túnekte» («Vo mrake») atalatyn kınotýyndynyń avtorlary QazAqparat tilshisine onyń túsirilim jumystary jóninde aıtyp berdi.
Stsenarıı avtory jáne fılmniń teń prodıýseri Danııar Aqshabaev Qazaqstan naryǵynda úreı týdyratyn fılmderdiń joqtyǵyn atap ótti.
«Іssapardan kele jatyp, horror-kvesttiń ıdeıasyn oılastyra bastadym. Osyny túgel qıystyrýǵa jarty jyl ýaqytym ketti. Árıne, basynda osyndaı jumyspen aınalysýǵa júreksindim. Biraq komandanyń arqasynda qıyndyqty jeńýge týra keldi. Postprodakshn jumysy da jaman emes. Odan bólek men ózim dybys rejısseri bolýyma týra keldi. Óıtkeni, qazaqstanda horror janrynda fılmderdiń dybysyn jazatyn kásibı maman joq eken», - dedi Danııar Aqshabaev.
Túsirilim toby Gollıvýd fılmderinen esh kem túspeıtin kıno túsirýge tyrysqan. Ideıa týyndaǵannan bastap, túsirilim jumystaryna deıin 2 jyl ýaqyt ótken.
«Negizinen túsirilim jumystarynyń 90% túngi ýaqytta júrgizildi - keshki 7-den tańǵy 7-ge deıin. Byltyr qyrkúıekte aýa raıy óte salqyn boldy»,- dedi stsenarıı avtory.
Onyń aıtýynsha, rólge ábden engen akterler sońynda mıstıkalyq qubylystardy baıqaı bastaǵan.
«Túsirilim alańynda barlyq adamdar úreı ústinde júrdi. Aktrısa Sábına Eralına ózin tý syrtynan bireý túrtkenin aıtty. Surastyra kele onyń artynda eshkim turmaǵany belgili boldy. "Qoryqqanǵa qos kórinedi" degendeı, túsirilim alańynda shynaıy qorqynyshty ahýal týdy»,- dedi ol.
Negizgi epızodtar Almaarasan men Baým baǵynda túsirilgen. Eki aıdan soń Tóle bı Rozybakıev kóshesinen qańyrap qalǵan ǵımarat tabylǵan. Tipti, Baým baǵynda tún ishinde aıǵaı men shý estilgende adamdar polıtsııa shaqyrǵan.
«Polıtsııa kelgende butaqtardyń arasynan qanǵa boıalǵan akter shyqty. Quqyq qorǵaýshylarǵa bárin tolyq túsindirdik. Olar bizge sáttilik tilep, óz joldarymen ketti»,- dedi Danııar.
«Túnekte» fılmi oıdan shyǵarylǵan oqıǵaǵa negizdelgen. Bir top jas qańyrap qalǵan bos oryndarǵa hıkaıa izdep baryp, tuzaqqa túsip qalady.
Basty rólderde Danııar Beısov, Sabına Eralına, Rysqul Qonaqbaev, Parhat Jalılov, Maksım Bogomolov, Nazerke Ámirova, Almas Jarasqan oınaıdy. Sondaı-aq ibilistiń rólin Alban Kárimuly men Dııar Mirsadyqov somdaǵan.
Alǵashqy horror fılm qazaqstandyq prokatqa 19 sáýirde shyǵady. Ony keıin halyqaralyq kınofestıvalderge qatystyrý josparlanǵan.
