Ýran salasyndaǵy ulttyq kompanııaǵa jańa ken oryndaryn ıgerýde basym quqyq beriledi
ASTANA. KAZINFORM — Májilistiń jalpy otyrysynda depýtat Edil Jańbyrshın kómirsýtekter men ýran salasyndaǵy jer qoınaýyn paıdalanýdy jetildirý máseleleri kózdelgen zań jobasynyń basty jańalyqtaryn atady.
— Birinshiden, sheginde shekteýli óńirlik geologııalyq zertteýler júrgizilmegen nemese júrgizilgen, olardyń nátıjeleri boıynsha perspektıvaly shógindi basseınder anyqtalmaǵan aýmaqtar az zerttelgen aýmaqtar dep tanylatyn norma engizildi. Ekinshiden, ınvestordyń senimin qamtamasyz etý úshin, endi óz qarajaty esebinen az zerttelgen aýmaqta geologııalyq zertteý júrgizgen ınvestor barlaý jáne óndirý kezeńine basym jáne kepildi quqyqpen óte alady. Bul úshin birinshi 3 jyl ishinde kelisimshart aýmaǵynyń keminde 30 paıyzyn qamtıtyn 2D seısmıkalyq zertteý júrgizý talaby engiziledi. ıAǵnı, kim shyn máninde zertteýge qarjy salsa, sol ári qaraı ıgerý quqyǵyn alady. Bul ádis ınvestordyń múddesin qorǵaıdy jáne elge jańa geologııalyq derekter beredi, — dedi depýtat.
Edil Jańbyrshınniń aıtýynsha, úshinshiden, rezervtegi ýchaskelerdiń tıimdi aınalymy qamtamasyz etiledi.
— Qazir kómirsýtek salasyndaǵy ulttyq kompanııalarǵa 53 jer qoınaýy ýchaskesi rezervke bekitilgen. Biraq olardyń tek 20 paıyzy ǵana ıgerile bastady. Qalǵandary uzaq jyldar boıy aınalymnan tys tur. Osyǵan baılanysty zań jobasy rezervteý merzimin shekteýdi, al bosaıtyn ýchaskelerdi elektrondyq aýktsıon arqyly naryqqa shyǵarýdy kózdeıdi. Bul tásil básekelestikti arttyryp, barlaý protsesin jedeldetedi jáne jańa oıynshylardyń kelýine múmkindik beredi, — dedi ol.
Depýtat tórtinshiden, ýran salasyndaǵy ulttyq kompanııaǵa basymdyq beriletindigin aıtty.
— Álemdik ekonomıkada ýrannyń mańyzy artyp keledi. Kóptegen elder atom energetıkasyn qaıta damyta bastady. Sondyqtan ýran salasyndaǵy ulttyq kompanııaǵa jańa ken oryndaryn izdeý jáne ıgerý boıynsha basym quqyq berý — strategııalyq sheshim. Bul — eldiń energetıkalyq teńgerimin saqtaýǵa jáne atom energetıkasy salasynda óz úlesimizdi arttyrýǵa baǵyttalǵan naqty qadam, — dedi májilismen.
Aıta keteıik, qazirgi ýaqytta Májilis kómirsýtekter men ýran salasyndaǵy jer qoınaýyn paıdalanýdy jetildirý máseleleri kózdelgen zań jobasyn qarap jatyr.