Ýran óndirýge jumsalǵan shyǵynnyń 1 paıyzyn óndirýshilerge jumsaý máselesi qaralyp jatyr
ASTANA. KAZINFORM - 2026 jylǵy 17 sáýirde Qazaqstan Respýblıkasy Atom energııasy jónindegi Agenttiginiń ǵylymı-tehnıkalyq keńesiniń kezekti otyrysy ótti.
Otyrys barysynda ǵylymı-zertteý, ǵylymı-tehnıkalyq jáne tájirıbelik-konstrýktorlyq jumystardy qarjylandyrý Qaǵıdalaryna sáıkes ótken jyldyń qorytyndylary boıynsha, 2026 jylǵa jáne 2027-2029 jyldarǵa arnalǵan josparly kezeńge jer qoınaýyn paıdalanýshylardyń ýran óndirý kezeńinde shekken óndirý shyǵyndarynyń 1 paıyzy esebinen qalyptastyrylǵan ǵylymı-tehnıkalyq tapsyrmalar qaraldy.
Bul otyrystyń aıryqsha mańyzdylyǵy jer qoınaýyn paıdalanýshylardyń ýran óndirýge jumsalǵan shyǵyndarynyń 1 paıyzy mólsherinde mindetti aýdarymdar esebinen qarjylandyrýǵa usynylatyn ǵylymı-tehnıkalyq tapsyrmalardyń tizbesi alǵash ret qaralǵandyǵymen baılanysty.
Bul Qazaqstan Respýblıkasy Ǵylym jáne joǵary bilim mınıstrligimen birlesip qurylǵan qoldanbaly ǵylymdy qarjylandyrýdyń ortalyqtandyrylǵan, ashyq jáne nátıjege baǵdarlanǵan tetigin qalyptastyrý jónindegi Memleket basshysynyń tapsyrmasyn praktıkalyq iske asyrý bolyp tabylady.
Jańa tásil ǵylymı-tehnıkalyq tapsyrmalardy qalyptastyrý men qaraýdyń, quraldardy maqsatty paıdalanýdyń biryńǵaı tártibin qamtamasyz etýge, sondaı-aq ǵylymı zertteýlerdi atom salasynyń ózekti óndiristik jáne tehnologııalyq mindetterimen tyǵyz baılanystyrýǵa baǵyttalǵan.
Mundaı tetik resýrstardy paıdalanýdyń tıimdiligin arttyrýǵa, ǵylymı ázirlemelerdiń fragmenttiligin tómendetýge jáne basym baǵyttar boıynsha ǵylymı-tehnıkalyq qyzmetti úılestirýdi kúsheıtýge múmkindik beredi.
Otyrys qorytyndysy boıynsha usynylǵan ǵylymı-tehnıkalyq tapsyrmalarǵa basymdyq berý boıynsha usynymdar ázirlendi.
-Usynylǵan materıaldar birlesip qurylǵan qarjylandyrý tetigi sheńberinde belgilengen tártippen odan ári pysyqtaý jáne qaraý úshin Qazaqstan Respýblıkasy Ǵylym jáne joǵary bilim mınıstrligine jiberiletin bolady,-delingen habarlamada.
Ǵylymı-tehnıkalyq tapsyrmalardy qaraý salanyń naqty qajettilikterine, otandyq quzyretterdi damytýǵa, naqty ǵylymı-tehnologııalyq nátıjelerge qol jetkizýge jáne ǵylymdy óndiristik sektormen tikeleı baılanystyrýǵa baǵyttalǵan qoldanbaly zertteýlerdi qoldaýdyń turaqty júıesin qalyptastyrýdaǵy mańyzdy kezeń boldy.
Osyǵan deıin ýran óndirýshi óńirlerdi áleýmettik qoldaý jumystary týraly jazdyq.
