Ýran óndirisinde álemde kósh bastaǵan eldiń birde-bir AES salmaýy aqylǵa qonbaıdy - Toqaev
ASTANA. KAZINFORM – Elimiz jer qoınaýynda sırek kezdesetin mıneraldar qory boıynsha álemdik kóshbasshylar qataryna qosylýy ábden múmkin. Bul týraly «Turkistan» gazetine suhbat bergen Memleket basshysy Qasym-Jomart Toqaev aıtty.
– Senimdi energııa kózi bolmasa, Qazaqstan ekonomıkanyń jańa tehnologııalyq úlgisine kóshe almaıtynyn túsinýimiz kerek. Sýperkompıýterlerge, data-ortalyqtar men avtomattandyrylǵan óndiris keshenderine óte kóp energııa qajet. Bul – jańa jahandyq tehnologııalyq qurylystyń basty talaby. Qýat kózderin salý úshin bilikti mamandar kerek. Kapıtal qory shamamen 4,5 trıllıon dollar bolatyn álemdegi eń iri kompanııa – NVIDIA-nyń basshysy jaqynda «kók jaǵalylar», ıaǵnı tehnıkalyq mamandyq ıeleri mýltımıllıonerler qataryna qosylady dep boljam jasady, - dedi Qasym-Jomart Toqaev.
Prezıdenttiń paıymynsha, birneshe atom stantsııasyn salý – birinshiden, tarıhı olqylyqtyń ornyn toltyrý degen sóz. Sebebi ýran óndirisi boıynsha álemde kósh bastap turǵan eldiń birde-bir atom elektr stantsııasyn salmaýy múldem aqylǵa qonbaıdy. Ekinshiden, bul qadam Qazaqstannyń abyroı-bedelin nyǵaıta túsedi.
– Biz atom stantsııalaryn salý arqyly tehnıkalyq ıntellıgentsııanyń jańa býynyn qalyptastyramyz. Tıisinshe, memlekettik saıasattyń túpki mánin ózgertemiz. Osyny qaperden shyǵarmaǵan jón, - dedi Memleket basshysy.
Qasym-Jomart Toqaev taǵy bir óte mańyzdy taqyryp – jer qoınaýynda sırek kezdesetin metaldarǵa da toqtaldy.
- Bolashaqta ondaı materıaldarǵa degen suranys arta beredi, aldaǵy bes jyldyń ózinde bul suranys eki ese ósedi. Osy rette, Qazaqstan úshin taǵy bir múmkindik ashylady. Elimiz jer qoınaýynda sırek kezdesetin mıneraldar qory boıynsha álemdik kóshbasshylar qataryna qosylýy ábden múmkin. Qazaqstan strategııalyq mańyzy bar osy saladaǵy óz rólin kúsheıtý úshin AQSh, Qytaı, Reseı, Ońtústik Koreıa, Japonııa elderimen jáne Eýropa Odaǵynyń birqatar memleketimen yntymaqtastyǵyn damyta bastady, - dedi Prezıdent.
Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.