Ýran óndirisin jańǵyrtýǵa bólingen 862 mln teńgeni urlaǵan merdiger 8 jylyn túrmede ótkizedi
ASTANA. KAZINFORM – Ýran óndirýshi kásiporyndy jańǵyrtýǵa bólingen 862 mln teńgeni urlaǵan merdiger uıym basshysy 8 jylǵa sottaldy. Bul týraly Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov málim etti.
«Memleket basshysynyń zańdylyq pen tártipti qamtamasyz etý jónindegi tapsyrmalaryn iske asyrý aıasynda Sybaılas jemqorlyqqa qarsy qyzmet jemqorlyqtyń, onyń ishinde joǵary laýazymdy adamdar arasynda onyń jolyn kesý boıynsha júıeli jumys júrgizip keledi. Túrkistan oblysynyń Sozaq aýdandyq soty merdigerlik uıymnyń dırektory – «Iri building» JShS N.T.Ábildınovke, «KAZ Design & Development Group LTD» JShS avtorlyq qadaǵalaý dırektory L.A.Momotqa, avtorlyq qadaǵalaý ınjeneri S.M.Konchakovqa, sondaı-aq tehnıkalyq qadaǵalaýshy – «KZ Development» akkredıttelgen ortalyq» JShS-nyń naqty menshik ıesi B.S.Almatovqa qatysty úkim jarııalady», - dedi resmı ókil.
Onyń dereginshe, Ábildınov Túrkistan oblysy Sozaq aýdanyndaǵy Qarataý kenishinde ýran óndirýshi kásiporyndy jańǵyrtý jobasyn iske asyrý aıasynda qurylys-montajdaý jumystaryna bólingen 862 mln teńgeni 2019-2021 jyldar kezeńinde urlanǵany úshin 8 jylǵa bas bostandyǵynan aıyryldy. Onyń sybaılastary Momot, Konchakov, Almatov urlaýǵa kómekteskeni úshin kináli dep tanyldy. Sot olarǵa 7 jylǵa shartty túrde bas bostandyǵynan aıyrý jazasyn taǵaıyndady.
«Bul rette, QR QK 75-babynyń 1-bóligi negizinde sot Konchakovty qylmystyq jaýaptylyqtan bosatyp, oǵan jalpy úlgidegi psıhıatrııalyq statsıonarda májbúrlep emdeýdi taǵaıyndady. Sondaı-aq sot sottalǵandardan materıaldyq zalaldy óndirip alý týraly azamattyq talapty qanaǵattandyrdy. Úkim zańdy kúshine engen joq», - dedi Danııar Bıgaıdarov.
Eske sala keteıik, buǵan deıin Sport salasynda jalǵan dıplommen nápaqy taýyp júrgen 260-tan astam adam anyqtalǵanyn jazǵan bolatynbyz.
Jobalaý-smetalyq qujattamany maquldaý kezinde asa iri mólsherde para alǵan sheneýnik ustaldy.
