Ýran óndirýge qatysty zańǵa ózgerister engizildi
NUR-SULTAN. QazAqparat – Búgin Parlament Májilisiniń jalpy otyrysynda palata depýtattary jer qoınaýyn paıdalaný máseleleri boıynsha qujatqa Senat engizgen tolyqtyrýmen kelisti, dep habarlaıdy QazAqparat.
Atap aıtqanda, 2020 jyldyń 23 jeltoqsanynda Parlament Májilisi «Jer qoınaýy jáne jer qoınaýyn paıdalaný týraly» Qazaqstan Respýblıkasynyń Kodeksine ýran óndirý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldaǵan bolatyn.
Bıylǵy 17 aqpanda Senattyń jalpy otyrysynda «atalǵan zań jobasy eki oqylymda qaraldy. Qujatqa tolyqtyrý engizilgendikten, zań jobasy Májiliske qaıtaryldy.
Zań jobasy Senat komıtettiń keńeıtilgen otyrysynda ekinshi oqylymda qaraldy. Qujat elimizdegi ýran óndirý salasyn quqyqtyq retteýdi jetildirýge baǵyttalǵan. Memleket basshysynyń bıylǵy 26 qańtarda Úkimettiń keńeıtilgen otyrysynda memlekettik jáne jeke operatorlardy qurýǵa tyıym salý jónindegi bergen tapsyrmasyn oryndaý maqsatynda Senat depýtattary zań jobasynyń birinshi babynyń besinshi tarmaqshasynyń 14,15,16,17,18-shi jáne 19-shy abzatsty alyp tastaýdy usyndy. Úkimettiń bıylǵy 17 aqpanda kelgen qorytyndysyna sáıkes, bul usynys qoldaý tapty. Zań jobasyndaǵy barlyq túzetýler ýran salasyndaǵy qarym-qatynastardy ári qaraı jetildirýge baǵyttalǵan.
Qujatty búgin Májilistiń jalpy otyrysynda depýtat, Ekologııa máseleleri jáne tabıǵat paıdalaný komıtetiniń tóraǵasy Aleksandr Mılıýtın QR Parlamenti Senaty engizgen ózgertýmen kelisýdi usyndy. Zań jobasyn qaraý kezinde palata depýtattary bul usynysqa qoldaý bildirdi.
