UOS jyldary qaza tapqan qazaqstandyq jaýyngerdiń máıiti elimizge jetkizildi

NUR-SULTAN. QazAqparat - Qazaqstandaǵy Uly Otan soǵysyndaǵy Jeńistiń 75 jyldyǵy tolǵan kúni erekshe oqıǵamen bastaldy. 1942 jyldyń qazan aıynda Smolensk túbindegi shaıqasta qaza tapqan qazaq sarbazynyń máıiti əskerı bortpen elordalyq avıatsııalyq bazasyna búgin tańerteń jetkizildi, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Áskerı qyzmetshiniń máıiti sáýir aıynyń basynda Smolensk oblysynyń Temkın aýdanynda izdeý-barlaý ekspedıtsııasyn júrgizý kezinde tabyldy. Qaıtys bolǵan jaýyngerdiń saqtaýly qalǵan medali arqyly aty-jóni anyqtaldy. Belgisiz jaýynger Qaraǵandy oblysy Shet aýdany Jasterek aýylynyń týmasy Medet Amanjolov bolyp shyqty. Soǵys aldynda ol áskerge shaqyrylyp, 1941 jyly 24 jasynda maıdanǵa attanady. Onyń sońǵy qyzmet orny 125-shi jeke atqyshtar brıgadasy boldy.

Jaýyngerdiń týystary əli kúnge deıin Shet aýdanynda turady. 1942 jyly otbasy Medet Amanjolov Smolenskini qorǵaýda erlikpen qaza bolǵany týraly hat aldy. Kóptegen jyldar boıy urpaqtary onyń jerlengen jerin tabýǵa tyrysyp, 78 jyldan keıin jaýynger Otanyna oraldy.

Soǵysta qaza tapqan jaýyngerdiń otbasy jerleý ornyna barǵysy keldi, biraq tótenshe jaǵdaıǵa baılanysty bul múmkin bolmady. Qazaq jaýyngerleriniń súıekterin otanyna qaıtarýǵa áskerı avıatsııa kúshteri qol jetkizdi. Jaqyn arada Shet aýdanynyń Aǵadyr zıratynda jaýyngerdi áskerı qurmetpen qaıta jerleý úshin týystaryna beriletin bolady.