UOS ardagerlerin marapattaý úshin arnaıy medaldar jasaldy

ASTANA. QazAqparat - Uly Otan soǵysynyń ardagerlerin marapattaý úshin arnaıy medaldar jasaldy. Bul týraly QR Densaýlyq saqtaý jáne áleýmettik damý vıtse-mınıstri Svetlana Jaqypova málim etti.

Onyń aıtýynsha, búgingi tańda Qazaqstanda 4715 Uly Otan soǵysynyń qatysýshylary men múgedekteri bar. Oǵan teńestirilgen azamattardyń sany 193 myńnan asyp otyr.

«Merekege oraı, birneshe sharalar qolǵa alynady. Birinshiden, medaldarmen marapattaý. QR Prezıdentiniń 2015 jylǵy 19 qańtardaǵy Jarlyǵyna sáıkes, «1941-1945 jyldardaǵy Uly Otan soǵysyndaǵy Jeńistiń 70 jyldyǵy» biryńǵaı merekelik medali quryldy. Sonymen qatar medalmen marapattaý qaǵıdasy bekitilip otyr. Estelik medaldarmen marapattaý úshin jáne birjolǵy materıaldyq kómek kórsetý úshin ákimdiktermen birge Uly Otan soǵysynyń qatysýshylary men múgedekterine Uly Jeńiske úles qosqany úshin olarǵa teńestirilgen azamattardyń tizimderi ózektendirildi. Jáne de Ulttyq bankpen 207 myń 923 medal daıyndalyp, ákimshilikterge jiberildi», - dedi ol.

Vıtse-mınıstrdiń aıtýynsha, qazirgi ýaqytta olarǵa medaldar tabystaý sharalary ótkizilip jatyr.