UOS ardagerleri men múgedekteri poıyzdarda bir aı tegin júredi
ASTANA. 29 sáýir. QazAqparat /Gúlmıra Álıakparova/ - Uly Otan soǵysynyń ardagerleri men múgedekteri poıyzdarda bir aı boıy tegin júretin bolady. Bul týraly «Qazaqstan temir joly» UK» AQ-dan málim etti.
Habarlanǵandaı, 9 mamyr - Jeńis kúni merekesine oraı UOS ardagerleri men múgedekteri Qazaqstan Respýblıkasy men TMD elderi aýmaǵynda temir jol kólikterinde bir aı boıy tegin júredi.
Ardagerler tegin bıletti jeke tulǵasyn rastaıtyn kýáligin, UOS ardageri nemese múgedegi týraly kýáliginiń túpnusqasy men kóshirmesin usyný arqyly temir jol kassalarynan ala alady. Ardagerlerge oryndar kýpe vagondardan beriledi.
QTJ-nyń baspasóz qyzmeti jolaýshy Táýelsiz Memleketter Dostastyǵy elderine shyqqan jaǵdaıda baryp-qaıtý bıletterin birden resimdeý qajettigin jáne aktsııa «Talgo» poıyzymen júrýdi qarastyrmaıtyndyǵyn eskertti.
Qajetti aqparattardy «Jolaýshylar tasymaly» AQ-nyń temirjol kassalary men táýlik boıy jumys isteıtin «105» anyqtama telefonynan alýǵa bolady.
