UOS ardagerleri Qazaqstan men TMD qalalaryna tegin usha alady
Bul týraly astana.kz saıtyna Astana qalasynyń Jumyspen qamtý jáne áleýmettik baǵdarlamalar basqarmasy málim etti.
Basqarmanyń málimeti boıynsha jeńildikti «Eır Astana» AQ pen «SCAT» avıakompanııasy» AQ usynyp otyr.
«Eır Astana» AQ 100 paıyz jeńildikti UOS ardagerlerine ekonom klasta júıeli túrde «Eır Astana» AQ oryndaıtyn reısterge Qazaqstan men TMD qalalary boıynsha avıabıletter satyp alǵan kezde usynady.
Tegin avıabıletter alý úshin ardagerlerde mynandaı qujattar bolýy qajet:
- UOS ardagerleri men múgedekteri úshin - tıisti organdar bergen UOS qatysýshy/múgedektik kýáligi;
- «UOS ardagerleriniń» basqa sanattary úshin - zeınetaqy taǵaıyndaǵan organ kýálandyrǵan zeınetaqy kýáligi;
- «Lenıngradty qorǵaǵany úshin» medali jáne Lenıngrad qorshaýynyń turǵyny» belgisi, tylda eńbek etkeni úshin, Uly Otan soǵys kezindegi áskerı qyzmeti úshin ordender men medaldermen marapattalǵandar úshin zeınetkerlik kýálikke qosa osy marapattardy rastaıtyn qujattar talap etiledi.
«SCAT» avıakompanııasy» AQ reısinde de 100 paıyz tarıf kóleminde jeńildik jasalady. Jolaýshydan tek áýejaı jıyntyǵy alynady. Kórsetilgen jeńildiktermen mundaı tasymaldy rásimdeý kezinde (DM00) Qazaqstan azamattyǵy talap etilmeıdi. Jeńildikti ıelenetin qujattardy usynsa, jetip jatyr.
Sondaı-aq, UOS ardageri men múgedeginiń qasyna ilesip júretin bir adamǵa tarıftiń 50 paıyzy kóleminde jeńildik beriledi. Qosymsha júk jıyntyǵy tólenedi. Jeńildikter bir jyl boıy jaramdy.
«Atalǵan jeńildikter UOS qatysýshylary men múgedekterin, olarǵa teńestirilgenderge (Lenıngrad qorshaýynyń turǵyny, kontslagerlerde azaptalǵandar men tyl qyzmetkerlerine) beriledi», - delingen habarlamada.
