UOS ardageri men jubaıyn óltirgen kúdiktilerdiń biri 9-shy synyp oqýshysy
ASTANA. 10 sáýir. QazAqparat - Almaty oblysy Sarqan aýdandyq ІІB-niń qyzmetkerleri zeınetkerlerdiń ólimine qatysty qylmystyq istiń betin ashty.
Bul týraly QR ІІM baspasóz qyzmetiniń málimetterinde habarlandy.
«Naýryz aıynyń sońynda óz úılerinen moınynda kesilgen jaraqaty bar 77 jastaǵy Uly Otan soǵysynyń ardageri men onyń 75 jastaǵy jubaıynyń máıitteri tabyldy. Atalǵan qylmys jóninde polıtsııaǵa jábirlenýshilerdiń kórshisi habar bergen», - delingen habarlamada.
Oblystyq ІІD krımınaldyq polıtsııa qyzmetkerleri júrgizgen jedel izdestirý sharalary kezinde Taldyqorǵan qalasynda 23 jastaǵy jergilikti turǵyn men kámelettik jasqa tolmaǵan mektep-gımnazııanyń 9-synyp oqýshysy quryqtaldy. Olar 29 naýryzda kúndiz zeınetkerlerdiń úıine urlyqqa túsip, onyń sońy adam ólimimen aıaqtalǵan.
Úıden aqsha tappaǵan qaskóıler soǵys ardageriniń áskerı marapattaryn qoldy qylǵan. Kúdiktilerdiń úlkeniniń úıin tintý barysynda polıtsııa qyzmetkerleri Uly Otan soǵysy qatysýshysynyń 2 medalin, birneshe tósbelgilerdi, sondaı-aq qylmys jasalǵan pyshaqty tapty.
Kúdiktiler qamaýǵa alynyp, olardyń ústinen qylmystyq is qozǵaldy.
