Ýorren Baffett ınvestıtsııalyq kompanııa basshylyǵynan ketedi
ASTANA. KAZINFORM — Ańyzǵa aınalǵan ınvestor Ýorren Baffett Berkshire Hathaway kompanııasynyń bas atqarýshy dırektory qyzmetinen ketedi. Bul týraly Kazinform menshikti tilshisi NBC News-ke silteme jasap habarlady.
95 jastaǵy Ýorren Baffett óz mansabynda shyǵynǵa batqan toqyma kompanııasyn aktıvterdi basqarý salasyndaǵy álemdegi eń tabysty korporatsııalardyń birine aınaldyrdy. Baffetttiń basshylyǵymen Nebraska shtatynda ornalasqan Berkshire temirjol, saqtandyrý, kámpıt pen balmuzdaq óndirisi sııaqty túrli salalarǵa ınvestıtsııa saldy.
Baffett ınvestıtsııalyq jolyn 1942 jyly, 12 jasqa tolmaı jatyp bastaǵan. Ol Cities Service gaz kompanııasynyń aktsııalaryn 114,75 dollaryna satyp alǵan. Bul maqsatqa jetý úshin ol 6 jasynan bastap jınaǵan.
16 jasqa kelgende onyń ınvestıtsııalary shamamen 53 myń dollarǵa jetti. 32 jasynda mıllıoner, al 56 jasynda mıllıarder atandy. Qazir Baffett Bloomberg Billionaires nusqasy boıynsha baılyǵy 150 mlrd dollar bolyp, álemdegi eń baı adamdar tiziminde 10-orynda tur.
1964 jyly ol Berkshire Hathaway kompanııasyn negizgi ınvestıtsııalyq qural retinde paıdalana bastady. Sol ýaqyttan beri kompanııa aktsııalarynyń baǵasy 5,5 mıllıon paıyzdan astam ósti. Salystyrý úshin aıtsaq, sol kezeńde S&P 500 ındeksiniń kiristiligi bar bolǵany 39 000% qurady (Bloomberg esepteýi boıynsha). Búginde Berkshire naryqtyq quny 1 trln dollardan asatyn, álemdegi eń qymbat kompanııalardyń ishinde 11-orynda.
Berkshire quramyndaǵy iri kásiporyndardyń qatarynda BNSF temirjoly, Geico saqtandyrý kompanııasy jáne See’s Candy, Benjamin Moore, Duracell, Fruit of the Loom, Oriental Trading, Dairy Queen, Helzberg Diamonds sııaqty tanymal brendter bar.
Baffett óziniń basty fılosofııasyn únemi ustanyp keldi: tek óziń túsinetin salaǵa ınvestıtsııa sal jáne qor naryǵyn udaıy utý qıyn ekenin umytpa.
Baffett Berkshire kompanııasyn mıllıarder Charlı Mangermen birge basqardy. Manger 2023 jyly 99 jasynda ómirden ótti.
Endi konglomerattyń basshylyǵyn Berkshire-diń energetıkalyq bólimshesiniń bas dırektory, 63 jastaǵy Greg Abel qolǵa alady. Al Ýorren Baffett kompanııanyń tóraǵasy qyzmetinde qalady.
Buǵan deıin TikTok AQSh-taǵy jumysyn jalǵastyrý úshin ınvestorlarmen kelisimge qol qoıǵanyn jazǵan edik.