Ýord kásibı bokstan ketse Golovkın P4P-reıtınginde kósh bastaýy múmkin

ASTANA. QazAqparat - Halyqaralyq bok federatsııasy (IBF), Búkilálemdik boks qaýymdastyǵy (WBA) jáne Búkilálemdik boks uıymy (WBO) tujyrymdary boıynsha jartylaı orta salmaqtaǵy álem chempıony amerıkalyq Andre Ýord kásibı mansabyn aıaqtaǵanyn jarııalaǵan bolatyn.

Qazirgi ýaqytta 33 jastaǵy amerıkalyq boksshy birqatar bedeldi basylymdardyń, sonyń ishinde ESPN jáne The Ring jýrnaldarynyń P4P-reıtınginde (salmaq sanatyna baılanyssyz) kósh bastap tur.  

Sport.kz-tiń habarlaýynsha, Ýordyń kásibı sporttaǵy mansaby resmı túrde aıaqtalǵannan keıin onyń aty-jóni boksshylar tiziminen alynyp tastalady dep kútilýde. Bul WBA (Super), WBC, IBF jáne IBO tujyrymdary boıynsha orta salmaqtaǵy álem chempıony Gennadıı Golovkınge (37-0-1, 33 KO) birinshi orynǵa kóterilýge múmkindik beredi. Qazir qazaqstandyq boksshy bul reıtıngte ekinshi bolyp tur.

Eske salaıyq, Golovkınniń sońǵy jekpe-jegi 16 qyrkúıek kúni AQSh-tyń Las-Vegas qalasynda meksıkalyq sportshy Saýl Alvareske qarsy ótti. Tóreshilerdiń sheshimimen aıqas teń aıaqtaldy. Jeńimpaz anyqtalmaǵanymen, GGG barlyq belbeýlerin (WBA (Super), WBC, IBF jáne IBO tujyrymdary boıynsha) saqtap qaldy.