«Ýolt Dısneıdiń» qazaq tilindegi alǵashqy jobasy - «Kólikter-2» mýltfılmi Qazaqstannyń 43 kınoteatrynda bir kúnde kórsetiledi
ASTANA. 10 maýsym. QazAqparat /Arman Asqarov/ - 23 maýsym kúni «Ýolt Dısneı» kompanııasynyń qazaq tilindegi alǵashqy jobasy - «Kólikter-2» mýltfılmi Qazaqstannyń 43 kınoteatrynda bir kúnde kórsetiletin bolady.
Bul týraly búgin osy jobaǵa qatysýshy «Bolashaq» qaýymdastyǵy keńesiniń tóraǵasy Baýyrjan Baıbek málim etti.
Onyń aıtýynsha, osydan jarty jyl buryn «Ýolt Dısneı» kompanııasynyń ókilderi Almatyǵa kelip, «Kólikter-2» mýltfılmine dýblıaj jasaıtyn ártisterdi iriktegen bolatyn. «Osydan keıin akterlerdiń daýysyn jazyp alyp, Los-Anjeles qalasyndaǵy mamandarǵa teksertken. Mine, búgin sol aýqymdy jumystyń nátıjesin kórip otyrmyz. 23 maýsym kúni «Ýolt Dısneı» kompanııasynyń qazaq tilindegi alǵashqy jobasy - «Kólikter-2» mýltfılmi Qazaqstannyń 43 kınoteatrynda bir kúnde kórsetiletin bolady», - dep atap kórsetti B.Baıbek. Onyń sózine qaraǵanda, atalǵan jobaǵa bólingen demeýshilik qarajattyń kólemi 16-17 mln. teńgeni quraıdy.
Osylaısha qazaq tili álemdik áıgili «Ýolt Dısneı» kompanııasyndaǵy resmı dýblıajdyń 39-shy tiline aınaldy. Buǵan deıin túrki halyqtary ishinde Dısneı fılmderi tek túrik tilinde ǵana jaryq kórgen. «Kólikter-2» mýltfılmin qazaq tilinde dýblıajdaǵan ártisterdiń ishinde Baqytjan Álpeıisov, Kúnsulý Shaıahmetova, Dáýlet Ábdiǵaparov, Nyshanbek Jubanaev jáne Azamat Qanapııaev bar.
