UOK prezıdenti Gennadıı Golovkın qazaqstandyq boksshylarmen kezdesti

ASTANA. KAZINFIRM — UOK prezıdenti Gennadıı Golovkın Býsto-Arsıtsıoda bokstan synǵa túsip jatqan Qazaqstan erler jáne áıelder quramasymen kezdesti. 

Olympic.kz-tiń habarlaýynsha, UOK basshysy Italııaǵa arnaıy kelip, búgin beıresmı jaǵdaıda sportshylarmen kezdesý ótkizgen. Ol irikteý týrnıriniń eń jaýapty kezeńi aldynda sportshylarǵa keńesin aıtyp, qoldaý tanytty.

«Munda bizdiń komandaǵa qoldaý kórsetý úshin keldim. Qazir ár boksshynyń aldynda úlken jaýapkershilik tur. Mine, osynyń bárin qabyldaı bilý qajet. Sharshy alańda úsh raýnd boıy bar kúshti salyp, múmkindikti jibermeý kerek. Qazaq boks mektebi álemdegi eń myqty mektep sanalady. Sondyqtan bizge bul dástúrdi jalǵastyrý úshin aıanbaý kerektigin umytpaıyq. Biz - bir komandamyz. Men únemi sizdermen birgemin, árdaıym qoldaýǵa daıynmyn», - dedi Golovkın bapkerler men boksshylar qaýymyna.

Óz kezeginde Qazaqstan erler quramasynyń kapıtany Aslanbek Shymbergenov qoldaý bildirip, aǵalyq aqylyn aıtqan Golovkınge rızashylyǵyn jetkizdi. 

«Bizge qoldaý kórsetip, rýhymyzdy kótergenińiz úshin alǵysymyz sheksiz. Sizdi kórgenimizge shyn júrekten qýanyshtymyz. Bizdiń maqsatymyz bir — elimiz úshin lıtsenzııa alý. Qolymyzdan kelgenshe aıanyp qalmaımyz», - dedi ol. 

Aıta keteıik, buǵan deıin Gennadıı Golovkınniń boksshylarymyzdy qoldaý úshin Italııaǵa barǵanyn jazǵan bolatynbyz.