UOK qysqy Azııa oıyndarynda ulttyq quramany qoldaýǵa baǵyttalǵan ıllıýstratsııa usyndy
ASTANA. KAZINFORM — 2025 jyly Harbınde ótetin Qysqy Azııa oıyndary qarsańynda Qazaqstan Ulttyq Olımpıadalyq komıteti sýretshi Áıgerim Káribaevamen birlese otyryp, elimizdiń sportshylaryn qoldaýǵa baǵyttalǵan biregeı ıllıýstratsııa jasady.
Illıýstratsııada qysqy sport túrleri – short-trek, mánerlep syrǵanaý, hokkeı, konkımen júgirý jáne shańǵy sporty avtorlyq stılde beınelengen. Jumys etno-modern stılinde oryndalyp, ulttyq dástúrler men zamanaýı óner úılesim tapqan.
«Illıýstratsııany jasaý barysynda ár sport túriniń erekshelikterin bólek kórsetkim keldi, biraq olar birtutas kompozıtsııa retinde kórinýi kerek edi. Ár sport túriniń erekshelikterin baıqap, olardyń barlyǵyn baılanystyratyn stılıstıkany tabýǵa tyrystym. Ár keıipkerdiń ózindik erekshe kıim úlgisin oılap taptym. Bul ıllıýstratsııa tek ádemi ǵana emes, sonymen qatar qazaq eliniń ulttyq erekshelikterin beıneleıdi. Sondyqtan ulttyq oıý-órnek, kók jáne kógildir tústerdiń reńkteri qoldanyldy. Nátıjesi kóńilimnen shyqty dep oılaımyn», – dedi Áıgerim Káribaeva.
«Bul ıllıýstratsııa arqyly biz sportshylarymyzǵa qoldaý bildirýdi ǵana emes, sonymen qatar sport pen ónerdiń kóp uqsastyǵy bar ekenin kórsetkimiz keldi. Ekeýi de adamdardy biriktire alady. Kópsalaly jarystar tek sporttyq shara ǵana emes, sonymen birge mádenıet toǵysqan úlken oqıǵa. Ártúrli elderden kelgen sportshylar men delegatsııalar ózara tanysyp, qarym-qatynas ornatady. Biz jasaǵan ıllıýstratsııa qazaqstandyq sport týraly ǵana emes, sonymen qatar ulttyq mádenıetimizdiń ereksheligin de kórsetedi», – dep atap ótti Qazaqstan UOK-niń PR jáne marketıng departamentiniń dırektory Gúlnaz Shúkenova.
Harbındegi Azııa oıyndary 7-14 aqpan aralyǵynda ótedi. Qazaqstan bıatlon, kerlıng, skı-alpınızm, hokkeı, short-trek, konkımen júgirý, shańǵy jarysy, frıstaıl-akrobatıka, taý shańǵysy jáne mánerlep syrǵanaý sııaqty sport túrlerinen óner kórsetedi.
Aıta keteıik, 20 qańtar kúni IX qysqy Azııa oıyndary alaýynyń estafetasy bastaldy.