UOK basshysy Azııa olımpıada keńesiniń vıtse-prezıdenti qyzmetine qaıta saılandy

ASTANA. QazAqparat - Taıland astanasy Bangkokte Azııa Olımpıadalyq Keńesiniń (AOK) 38-shi Bas Assambleıasy óz jumysyn aıaqtady, dep habarlaıdy QazAqparat Ulttyq olımpıada komıtetine silteme jasap.

Assambleıa kún tártibindegi basty másele - AOK prezıdentin, sondaı-aq, AOK Atqarýshy komıtetiniń quramyn jáne AOK turaqty komıssııasyn saılaý bolatyn. Daýys berý qorytyndysy boıynsha, Qazaqstan Ulttyq Olımpıada komıtetiniń prezıdenti Tımýr Qulybaev 2019-2022 jyl aralyǵynda AOK-tiń Ortalyq-Azııa aımaǵy boıynsha vıtse-prezıdenti qyzmetine qaıta saılandy. AOK prezıdenti, sheıh Ahmad-ál-Fahad-ál-Sabah taǵy da tórtjyldyq kezeńge saılandy.

Bas Assambleıa otyrysynda ótken jyl qorytyndylanyp, 2018 jyly Djakarta men Palembangta ótken jazǵy Azııa oıyndaryn Uıymdastyrýshy komıtettiń esebi tyńdaldy. Sonymen qatar, Olımpıadalyq yntymaqtastyqtyń jańartylǵan baǵdarlamasy men 2020 jyly Tokıoda, 2022 jyly Beıjińde ótetin Olımpıada oıyndaryn uıymdastyrý komıtteteriniń daıyndyq barysy tanystyryldy.

AOK uıymdastyrǵan is-shara aıasynda Qazaqstan UOK ókilderi Aýǵanstan jáne Iran UOK basshylarymen ekijaqty kezdesý ótkizdi. Sondaı-aq, Qazaqstan UOK pen jaqynda saılanǵan Aýǵanstan UOK prezıdenti, doktor Hafızýlla Valı Rahımı arasynda áriptestik týraly Memorandýmǵa resmı túrde qol qoıyldy.

Iran UOK prezıdenti, doktor Saıed Reza Salıhı Amırı Qazaqstan UOK tarapymen tyǵyz baılanys ornatýǵa daıyn ekenin aıtyp, elimizdegi sporttyń damý qarqynyna joǵary baǵa berdi. Sonymen qatar, Qazaqstandy Ortalyq Azııada kóshbasshy sanaıtynyn jetkizdi. Ol Qazaqstan UOK basshylyǵyn eki el arasyndaǵy áriptestik týraly Memorandýmǵa qol qoıý úshin Tegeranǵa shaqyrdy.

Qazaqstan UOK ókilderi Halyqaralyq tekbol federatsııasy (FITEQ) ókilderimen kezdesip, Qazaqstanda tekboldy damytý jáne ulttyq federatsııa qurý múmkindigin talqylady.