Únzıla Shapaq: Preambýla el damýynyń baǵytyn aıqyndaıdy

ASTANA. KAZINFORM – Konstıtýtsııanyń preambýlasyna engizilgen ózgerister onyń mańyzyn arttyryp, memlekettiń damý baǵytyn aıqyndaıdy. Bul týraly QR Parlamenti Májilisiniń depýtaty, zań ǵylymdarynyń doktory Únzıla Shapaq «Jibek Joly» telearnasynyń «Ýáde» baǵdarlamasynda málimdedi.

Onyń aıtýynsha, buǵan deıin preambýla kóbine kirispe retinde ǵana qabyldanyp, róli tolyq baǵalanbaǵan. Al qazirgi ózgerister bul túsinikti ózgertti.

– Preambýla – jaı kirispe emes. Onda memleket qandaı baǵytta damıtyny jáne qandaı qundylyqtardy ustanatyny kórsetiledi, – dedi depýtat.

Ol sońǵy ózgerister aıasynda preambýlaǵa «Ádiletti Qazaqstan» uǵymy engizilgenin atap ótti.

– Buryn biz quqyqtyq, demokratııalyq memleket quramyz dep aıttyq. Biraq ony qalaı baǵalaımyz degen suraq boldy. «Ádiletti Qazaqstan» osy maqsattyń naqty ólshemi retinde engizildi, – dedi Únzıla Shapaq.

Sonymen qatar, depýtat bul uǵym «zań men tártip» qaǵıdatymen baılanysty ekenin jetkizdi.

– Zań bárine birdeı jumys istegen kezde ǵana ádildik ornaıdy. Zań saqtalsa – tártip qalyptasady, al tártip bar jerde qoǵamda ádilettilik nyǵaıady, – dedi ol.

Depýtattyń aıtýynsha, preambýlada bekitilgen qaǵıdattar keıin naqty zańdar arqyly júzege asyrylady.

Aıta keteıik, 17 naýryzda Memleket basshysy Qasym-Jomart Toqaev Qazaqstan Respýblıkasynyń Konstıtýtsııasyna jáne ony iske asyrý jónindegi sharalar týraly Jarlyqqa qol qoıdy.