Ýnzıla Shapaq Konstıtýtsııalyq Keńes múshesi bolyp taǵaıyndaldy

ASTANA. QazAqparat - Ýnzıla Shapaq QR Konstıtýtsııalyq Keńes múshesi bolyp taǵaıyndaldy. Búgin Parlament Senatynyń jalpy otyrysynda palata spıkeriniń usynysyna oraı, depýtattar osyndaı sheshim qabyldady.

Eske sala keteıik, buǵan deıin Konstıtýtsııalyq Keńes múshesi Anar Jaıylǵanova «Nur Otan» saıası partııasynyń qataryna ótý týraly tańdaý jasap, onyń ókilettigi toqtatylǵan bolatyn.

Sonymen qatar, Konstıtýtsııaǵa sáıkes, Parlament palatalary Konstıtýtsııalyq Keńestiń eki múshesin taǵaıyndaıdy. Al Keńes músheligine kandıdatty palata tóraǵasy usynady. Osyǵan baılanysty Senat tóraǵasy Qasym-Jomart Toqaev Konstıtýtsııalyq Keńes múshesi laýazymyna Ýnzıla Shapaqtyń kandıdatýrasyn usynǵan bolatyn. Depýtattar bul usynysty qoldady.

Ý. Shapaq 1973 jyly týǵan, joǵary zańgerlik bilimi, zań ǵylymdarynyń doktory ǵylymı dárejesi bar. 2011 jyldan beri «Qazaq Memlekettik Zań ýnıversıteti» AQ Joǵarǵy quqyq mektebiniń dırektory qyzmetin atqaryp kelgen.