«University Medical Center» korporatıvtik qory 6 jastaǵy Vıkanyń ólimine qatysty túsinikteme berdi
ASTANA. QazAqparat - «University Medical Center» korporatıvtik qorynyń PR-menedjeri Danııar Meńilbekov aqtaýlyq 6 jastaǵy Vıkanyń ólimine qatysty túsinikteme berdi, dep habarlaıdy «QazAqparat».
«Buǵan deıin de san márte habarlanǵandaı, Qazaqstanda balalardy apparattan ajyratýǵa ruqsat joq. Tıisinshe, onyń aǵzasy úsh aı boıy apparatpen jumys istep turdy. Aqyry, dárigerlerdiń tilimen aıtqanda, keshe keshke saǵat 17.20-da tolyq dekompensatsııa boldy. ıAǵnı, onyń aǵzasy apparattyń qoldaýymen de jumys isteýin toqtatyp, bıologııalyq ólim tirkeldi. Al osydan bir aı buryn bas mıy ólgeni týraly klınıkalyq qorytyndy jasalǵany belgili»,- dedi Meńilbekov QazAqparat tilshisine.
Eske sala keteıik, 20 tamyzda Aqtaýda alty jasar qyz joǵalyp ketken bolatyn. Birneshe saǵattan keıin polıtseıler balany óndiristik aımaq aýdanynan tapqan edi. Denesinde kóptegen jaraqaty bolǵan kishkentaı qyzdyń zorlanǵandyǵyn dárigerler anyqtaǵan. Osydan keıin QR QK 120-babymen qylmystyq is qozǵaldy. 27 tamyzda alty jasar qyz Mańǵystaý oblystyq balalar aýrýhanasynan sanavıatsııamen Astanaǵa jetkizildi. 6 qyrkúıekte Aqtaý polıtseıleri kishkentaı qyzdy zorlaýǵa qatysty kúdiktini ustady. Ol óz kinásin moıyndady. Tergeý barysynda onyń qyzdy zorlaǵanyn genetıkalyq saraptama da rastaǵandyǵy aıtyldy. Búldirshin qyz Ana men bala ulttyq ǵylymı ortalyǵynyń balalar anestezıologııasy jáne jan saqtaý bóliminde jatty. Nevrolog, balalar gınekology, pýlmonolog, okýlıst, nefrolog, endokrınolog, hırýrg sııaqty beıindi mamandardyń qatysýymen birneshe márte konsýltatsııa uıymdastyryldy. Sonymen qatar, telemedıtsına arqyly Kembrıdj ýnıversıteti (Ulybrıtanııa) jáne Vena ýnıversıtetiniń (Avstrııa) professorlarymen keńes ótkizilgen edi.
