Ýnıversıtetterdiń avtonomııasyn júıeli túrde arttyrý qajet — depýtat
ASTANA. KAZINFORM — Joǵary oqý oryndarynyń avtonomııasyn keńeıtý qajet. Senator Ǵalıasqar Sarybaev óziniń depýtattyq saýalynda osy máselege nazar aýdardy.
Onyń aıtýynsha, qoldanystaǵy model shekteýli kúıinde qalyp otyr jáne ýnıversıtetterdiń tolyqqandy ınstıtýtsıonaldyq derbestigin qamtamasyz etpeıdi.
— Jahandyq bilim berý keńistiginiń transformatsııasy jaǵdaıynda ýnıversıtetter bilim generatsııasynyń, ınnovatsııalar men ekonomıkalyq ósýdiń ortalyqtaryna aınalyp otyr. Alaıda, Qazaqstanda júrgizilgen taldaýlarǵa sáıkes qabyldanǵan sharalar ýaqytsha sıpat alǵan, shyn máninde joǵary jáne joǵary oqý orynynan keıingi bilim berý uıymdarynda tolyqqandy derbestik qamtamasyz etilmegen, — dedi Ǵalıasqar Sarybaev Senattyń jalpy otyrysynda.
Saýalda qazirgi zamanǵy ýnıversıtetter tek bilim berý mekemeleri ǵana emes, sonymen qatar bilim, ınnovatsııalar men ekonomıkalyq ósýdi qalyptastyratyn ortalyqtar ekeni basa aıtylǵan. Bul rette halyqaralyq tájirıbe akademııalyq, qarjylyq jáne uıymdastyrýshylyq derbestikti keńeıtý JOO-lardyń jahandyq reıtıngterdegi ornyna, ǵylymnyń damýyna jáne ınvestıtsııa tartýǵa tikeleı áser etetinin kórsetedi.
— Qoldanystaǵy model basqarý, ınvestıtsııa tartý, halyqaralyq yntymaqtastyqty damytý jáne ǵylymı ázirlemelerdi kommertsııalandyrý múmkindikterin shekteıdi. Saqtalyp otyrǵan ákimshilik basqarý júıesi sheshim qabyldaýda kóp merzimdi qajet etedi, ýnıversıtetterdiń jańa tehnologııalyq ózgeristerge jedel beıimdelýine múmkindik bermeıdi, — dedi depýtat.
Sonymen qatar senator joǵary bilim berý júıesindegi ınstıtýtsıonaldyq teńsizdikke nazar aýdarady. Nazarbayev University sııaqty keńeıtilgen avtonomııanyń sátti mysaldary bola tura, bul model basqa jetekshi JOO-larǵa, sonyń ishinde ulttyq zertteý ýnıversıtetterine taralmaıdy, bul olardyń damýyn jáne halyqaralyq ǵylymı-bilim berý kún tártibine qatysýyn shekteıdi.
Senatordyń usynysy — avtonomdy bilim berý uıymdary ınstıtýtyn júıeli túrde qalyptastyrýǵa kóshý. Onyń ishinde zańnamany keńeıtý jáne bul mártebeni ulttyq zertteý ýnıversıtetterine berý, avtonomııanyń saralanǵan modelin engizý, endaýment-qorlardy damytý, baıqaý keńesteriniń jumysyn jetildirý, satyp alýdyń arnaıy rejımderin engizý, sondaı-aq ǵylymı ázirlemelerdi kommertsııalandyrý men halyqaralyq mamandardy tartýǵa jaǵdaı jasaı otyryp, JOO-lardyń kadrlyq jáne qarjylyq derbestigin keńeıtý qarastyrylǵan.
Aıta keteıik, buǵan deıin stýdentter men oqytýshylardyń akademııalyq múmkindikteri keńeıetinin jazǵan edik.
