Ýnıversıtetterdiń avtonomdy basqarylý júıesi týraly zań 1 qyrkúıekte daıyn bolmaq
ASTANA. QazAqparat - Ýnıversıtetterdi avtonomdy basqarý júıesi týraly zań 1 qyrkúıekte daıyn bolady dep josparlanýda.
Bul týraly búgin Astanada QR Prezıdenti janyndaǵy Ortalyq kommýnıkatsııalar qyzmetiniń baspasóz máslıhatynda L.Gýmılev atyndaǵy EUÝ rektory Erlan Sydyqov málim etti.
Eske sala keteıik, bıyl QR Prezıdenti N. Nazarbaev eldegi ýnıversıtetter qyzmetiniń tıimdiligin arttyrý úshin olardy avtonomdy basqarýǵa kóshirý jóninde tapsyrma bergen bolatyn.
"Meniń oıymsha, bul durys qadam. Avtonomııa ýnıversıtetterge belgili bir erkindik beredi. Bul onyń basqarýyndaǵy, baǵdarlamalardy jasaýdaǵy isine salıqalylyq, erkindik berip, óz qarjysyn tıimdi basqarýǵa jáne baǵyttaýǵa áserin beredi. Memleket ýnıversıtetterdi basqarýdan ketedi, al onyń ornyn qoǵamdyq basqarý júıesi almastyrady, qoǵamdyq keńes qurylady. Olar ýnıversıtettiń damý strategııasyn anyqtaıdy, rektorlardy taǵaıyndaý boıynsha sheshimderdi qabyldaıdy. Shetelden top-menedjerlerdi jaldaý quqyqtary da paıda bolmaq", - deıdi ol.
"Biraq bul maqsattardy júzege asyrý úshin tıisti zańnama qabyldanýy kerek. Osy ispen qazir QR BǴM basshylyǵy shuǵyldanýda. Bul zańdy biz 1 qyrkúıekte kóremiz dep josparlaýdamyz", - dep atap ótti rektor.
