Ýnıversıtetter janynan qurylǵan zerthanalar barlyq zertteýshiler úshin qashanda ashyq bolýy tıis - Elbasy
A. Qarashanyń 13-i. QazAqparat /Qanat Mámetqazyuly/ ‑ Elimizdegi ýnıversıtetter janynan ashylǵan zerthanalar barlyq zertteýshiler úshin qashanda ashyq bolýy tıis. Búgin Qazaqstan Respýblıkasynyń Prezıdenti Nursultan Nazarbaev respýblıkalyq telearnalar boıynsha ótip jatqan tikeleı jelidegi suhbaty barysynda London qalasynda oqyp jatqan «Bolashaqtyqtar» joldaǵan saýalǵa osylaı jaýap berdi,
dep habarlaıdy QazAqparat.
Bolashaqtyqtar eń aldymen «Kaspıonet» spýtnıktik arnasy boıynsha Memleket basshysynyń stýdentter aldynda oqyǵan dárisin tamashalaǵanyn jetkizdi. Sonymen birge, álemniń aldyńǵy qatarly oqý oryndarynda ǵylymı-tehnıkalyq parkter jumys jasaıtynyn, onda ǵylym men bıznes birigip ǵylymı zertteýlerdi júzege asyratynyna toqtalǵan «bolashaqtyqtar», qazaqstandyq ýnıversıtetterde de osyndaı ǵylymı-tehnıkalyq parkterdi ashýǵa qatysty Prezıdenttiń oıyn bilgisi keletindikterin aıtty.
«Men bundaı qadamdy, bastamany qoldaımyn. Stýdentter aldyndaǵy dáris barysynda zııatker ultty qalyptastyrý máselesine toqtalǵan bolatynmyn. Árıne, buny alǵash ret aıtyp otyrǵan joqpyn, bul baǵytta birshama ister atqaryp ta jatyrmyz. Meniń oıymsha, búgingi qazaqstandyq jastar aldyńǵy qatarly bilimdi meńgere otyryp, bizdiń bolashaǵymyzdy qurýǵa belsendi aralasady, alǵa jyljýdyń lokomotıvine aınalady», degen Elbasy bilim men ǵylym salasynda atqarylyp jatqan sharalarǵa da toqtalyp ótti.
«Meniń nusqaýym boıynsha elimizdiń barlyq oblys ortalyqtaryndaǵy negizgi ýnıversıtetterde 15 zerthana quryldy. Ýnıversıtetter buny óz zerthanasy dep sanamaýy kerek, bul barlyq zertteýshiler úshin ashyq bolýy shart. Budan basqa elimizdegi 5 ulttyq zerthanalardyń árqaısysynda árbir ónertapqysh, izdenýshi óz jumysyn tolyq júzege asyra alady», dedi Memleket basshysy.
