Ýnıversıtetter men kásiporyndardyń janynan mamandandyrylǵan ınjınırıng ortalyqtary ashylady

ASTANA. QazAqparat – QR Premer-Mınıstri Álıhan Smaıylov Úkimet otyrysynda eldegi jetekshi ýnıversıtetter men kásiporyndardyń janynan mamandandyrylǵan ınjınırıng ortalyqtaryn ashýdy tapsyrdy, dep habarlaıdy QazAqparat tilshisi.

«Ǵylym mınıstrligi múddeli memlekettik organdarmen birlesip, «Ǵylym jáne tehnologııalyq saıasat týraly» zań jobasy sheńberinde ǵylymı zertteýlerdiń nátıjeliligin, olardyń ekonomıkalyq áserin arttyrý jóninde naqty sharalar kózdesin», - dedi Premer-Mınıstr.

Onyń aıtýynsha, elde sátti iske asqan ǵylymı zertteýlerdiń nátıjelerin kommertsııalandyrý úshin mınıstrlik ınvestıtsııa tartý isine de aralasý kerek.

«Atameken» palatasymen birlesip, elimizdiń jetekshi ýnıversıtetteri men iri kásiporyndarynyń janynan mamandandyrylǵan ınjınırıngtik ortalyqtar men tehnologııalyq parkterdi qurý jónindegi jumysty uıymdastyrý qajet.

Ǵylymı ınstıtýttardyń, ýnıversıtetterdiń jáne óndiristiń tıimdi ózara is-qımyly ǵylymnyń damýyna jáne jańa ǵylymı jobalardy óndiriske engizýge oń serpin beredi», - dedi Álıhan Smaıylov.