Ýnıversıtet túlekteriniń árbir úshinshisi óz mamandyǵy boıynsha jumys istemeıdi — Espaeva
ASTANA. KAZINFORM — Búgin Parlament Májilisinde joǵary bilimdi kadrlardy daıarlaý taqyrybyna arnalǵan Úkimet saǵatynda Májilis tóraǵasynyń orynbasary Danııa Espaeva eńbek naryǵyndaǵy kemshilikti atady.
— Qabyldanyp jatqan sharalarǵa qaramastan, joǵary bilim berý júıesiniń aldynda birqatar ózekti másele bar. Birinshiden, eńbek naryǵynyń qajettilikterin uzaq merzimdi boljaýdyń joqtyǵy. Ýnıversıtet túlekteriniń árbir úshinshisi óz mamandyǵy boıynsha jumys istemeıdi. Eńbek naryǵyndaǵy suranys memlekettik bilim berý tapsyrysy túzetilgennen áldeqaıda jyldam ózgerip jatyr, bul bir mamandyqtar boıynsha artyq daıarlaýǵa, al basqalary boıynsha tapshylyqqa ákeledi, — dedi Danııa Espaeva Parlament Májilisinde.
Osy oraıda ol joǵary bilim berý júıesi eńbek naryǵynyń transformatsııasyna ilese almaı otyrǵanyn, al túlekterdiń quzyretteri jumys berýshilerdiń qazirgi talaptaryna sáıkes kelmeı jatqanyn aıtty.
Budan buryn habarlanǵandaı, 2035 jylǵa qaraı Qazaqstanda 562 kásip nemese eńbek naryǵynyń 44%-y (shamamen 4 mln adam) jasandy ıntellektiniń yqpalymen ózgerýi múmkin.
