Ýnıversıtet oqytýshylary qaraǵandylyq oqýshylardy olımpıadalarǵa daıyndaıdy
QARAǴANDY. QazAqparat - Qaraǵandy oblysy pedagogtarynyń tamyz aıynda ótken onlaın-keńesinde «Beıindik mektep» jańa jobasy týraly aıtyldy.
Ýnıversıtet oqytýshylary aımaq oqýshylaryn respýblıkalyq jáne halyqaralyq olımpıadalarǵa daıyndaıdy, dep habarlaıdy QazAqparat tilshisi.
Oblystyq bilim basqarmasynyń basshysy Gúlsim Qojahmetova beıindik mektepter eki joǵary oqý orny – E. A. Bóketov atyndaǵy Qaraǵandy ýnıversıteti jáne Qaraǵandy ekonomıkalyq ýnıversıteti bazasynda qurylatynyn habarlady.
Onda olımpıada komandasynyń rezervine kiretin 7-9 synyp oqýshylary bilimderin jetildire alady. Sabaqtar qoǵamdyq-gýmanıtarlyq pánder, fızıka, ınformatıka, ekonomıka, qoldanbaly matematıka, aǵylshyn tili boıynsha ótkiziletin bolady.
«Osy jyldyń maýsym aıynda biz balalarǵa qosymsha bilim berýdiń «Saryarqa daryny» óńirlik ǵylymı-tájirıbelik ortalyǵymen ózara yntymaqtastyq týraly memorandýmǵa qol qoıdyq. Oqýshylardyń bilimin jetildirý boıynsha birlesken bilim berý is-sharalary týraly ýaǵdalastyq ornatyldy. Oqýshylardy olımpıadalarǵa daıyndaý basym baǵyt bolyp tabylady. Semınarlar, shyǵarmashylyq baıqaýlar, ǵylymı konferentsııalar men trenıngter josparlanǵan», – dedi QEÝ rektory Erqara Aımaǵambetov.
Onyń aıtýynsha, ýnıversıtet óz bazasyn usynady. Olar: «Dostyq» kovorkıng-ortalyǵynyń bıznes-ınkýbatory, kompıýterlik ortalyq, oqý jáne ǵylymı-zertteý zerthanalary jáne t. b.
Gúlsim Qojahmetova oqýshylardyń bilim sapasyn arttyrý boıynsha ózge de bastamalardy atap ótti. Bul jobalar «Jas matematık», «Qala – aýyl», «Vırtýaldy mektep» syrttaı mektebi. Jańa oqý jylynda ekologııa, medıasaýattylyq, synı oılaý kýrstary ashylady.
