Ýnıversıadaǵa kıim daıyndaǵan qazaqstandyq tigin kompanııasy sheberhanadaǵy jumysty kórsetti
ALMATY. QazAqparat - Qazaqstandyq «Altyn juldyz» tekstıl kompanııasy 28-shi Dúnıejúzilik qysqy Ýnıversıadaǵa qatysatyn sportshylar, eriktiler men tóreshilerdiń kıimin 45 kúnde tapsyrdy. Tiginshiler kúnine 500 adamǵa deıin kıim daıyndap, barlyǵy 33 824 túrli kıim tikken. Bul týraly tigin kompanııasynyń dırektory Altyn Qadys Janat QazAqparat tilshisine aıtyp berdi.
Búgin BAQ ókilderine arnaıy press-týr uıymdastyrǵan «Altyn juldyz» tigin kompanııasy ýnıversıada kıimderiniń qalaı ázirlenip jatqanyn kórsetti.
«Kúnine tiginshiler eki aýysymmen jumys jasap, 500 adamǵa kıim tigip otyrdy. Tapsyrystyń alǵashqy partııasyn kelisimshart jasasqannan keıin 45 kúnnen soń tapsyrdyq. Qazir kıimderdiń 90 paıyzy daıyn. Endi tek, polıtseıler men dárigerlerdiń kıimderin daıyndap jatyrmyz. Jalpy, ujymymyzda 107 tiginshi bar. Trıkotajdy Túrkııadan alǵanymyzdy aıta ketý kerek. Sebebi, Qazaqstanda bul sala kenje qalyp keletini jasyryn emes. Sondyqtan, qysqa merzimde daıyndaý úshin shet elden satyp alýǵa týral keldi. Barlyǵy 33 824 kıim daıyndadyq. Munyń ishinde sportshylar, eriktiler, tóreshiler, uıymdastyrýshylardyń kıimderi bar, buǵan sómkelerdiń de sany kiredi. Alǵashqy daıyn kıimderimizdi 2016 jyldyń qarasha aıynda ótkizdik. Kıimderdiń túıme, japsyrǵysh sekildi usaq-túıekteri men jarnamalyq japsyrmalary jumysty azdap tejegeni bolmasa, jalpy tapsyrysty ýaqytynda úlgerdik», - dedi Altyn Janat.
Sonymen qatar, ol kıim dızaınynda ulttyq oıý, túr-túsin tańdaǵanda qazaq dalasynyń jazıra jazyǵynyń óńi tańdalyp alynǵanyn aıtty.
«Kıimderdiń túsine de erekshe mán berdik. Eriktiler jastar bolǵandyqtan ashyq jarqyn, jasyl tústi tańdasaq, uıymdastyrýshylar úshin qyzyl tústi aldyq. Kıimderdegi boıaýlar qanyq. Qazaqtyń oıý órnegin, baıraǵymyzdyń túsin berýge tyrystyq. Jalpy, biz dızaınerlermen aqyldasa otyryp, 4 túrli úlgi ázirlep Ýnıversıada dırektsııasyna, Almaty ákimdigine kórsettik. Olar bir modeldi tańdady. Osydan keıin, biz qandaı matadan qandaı kıim túrlerin ázirleıtinimizdi belgilep aldyq. Kıimderdiń kólemi úlken. Mysaly, 3000 eriktige kıim tiktik. Onyń bir úlgisiniń ózi úsh kıimnen turady: tymaq, kúrte, shalbary bar sport kúrtesi jáne rıýkzak. Buǵan deıin qazaq eliniń sportshylarynyń kıimin tigip júrgen kompanııaǵa bul asa qıyndyq týǵyzbady», - deıdi Altyn Janat.
Sonymen qatar, ol tapsyrystyń 90 paıyzyn daıyndaǵan kompanııa qyzmetkerleri endi polıtseıler men dárigerlerdiń kıimin de ýaqytynda ótkizýge tyrysyp jatqanyn aıtty.
