Ýnıversıadaǵa bılet satyp alǵandar arasynda ótkizilgen utystyń birinshi kezeńi qorytyndylandy
ASTANA. QazAqparat - 2017 jyldyń 11 qańtaryna deıin Ýnıversıada-2017 oıyndaryna satyp alynǵan bıletter arasynda ótkizilgen utys oıynnyń birinshi kezeńi aıaqtaldy. Baǵy janǵan 12 adam Ýnıversıada uıymdastyrýshylarynan jáne Qysqy oıyndardyń resmı seriktesterinen baǵaly syılyqtardy almaq.
Ýnıversıada-2017 oıynynyń birinshi kezeńinde utysqa ıe bolǵan bıletterdiń tizimi 2017 jyly Almatyda ótetin 28-shi Dúnıejúzilik qysqy ýnıversıadanyń resmı saıtynda jáne Facebook paraqshasynda jarııalandy.
Uıymdastyrýshylardyń habarlaýynsha, utystardy alý úshin 28-shi Dúnıejúzilik qysqy ýnıversıada Dırektsııasyna kelesi mekenjaı boıynsha habarlasý qajet: Almaty q., Baızaqov k., 280, soltústik munara nemese 8 (727) 313 23 25 telefonyna qońyraý shalýǵa bolady.
Esterińizge salyp óteıik, 2016 jyldyń 20 jeltoqsanynda bastalǵan júldelerdiń utys oıyny eki kezeńde ótkiziledi. Ýnıversıada aıasyndaǵy sporttyq oqıǵalarǵa bılet satyp alǵan jasy 18-den asqan kez kelgen QR azamaty utys oıynǵa qatysa alady. Utys oıyn satyp alynǵan bılettiń biregeı toǵyz tańbadan turatyn nómirine qarap ótkiziledi. Shaqyrý bıletteri jáne quny joq bıletter utys oıynǵa qatysa almaıdy.
2017 jyldyń 8 aqpanyna deıin satyp alynǵan bıletterdiń barlyǵy utys oıynnyń ekinshi kezeńine qatysady. Ekinshi kezeńde Sapporodaǵy Azııa oıyndaryna 2 saıahat, sondaı-aq, «Bazıs-A» korporatsııasynyń usynyp otyrǵan sýper júldesi - «ALMALY» turǵyn aýdanynda ornalasqan eki bólmeli páter utysqa salynady.
«ALMALY» turǵyn aýdany «BAZIS» qurylys kompanııasy salǵan Ýnıversıadanyń bas nysany - Almaty Arena muz saraıynyń qarsy jaǵynda ornalasqan. «BAZIS-A Korporatsııasy» JShS basqarma tóraǵasy Pavel Belovıch «Almaty Arena» muz saraıyn salyp jatqan kezdiń ózinde osy aýdannyń damý keleshegi joǵary dep baǵalanǵanyn atap ótti.
- Almaty Arena muz saraıyn salyp jatqan kezdiń ózinde biz damyp jatqan aýdannyń áleýetin baıqap, Ýnıversıada bas nysanynyń qarsy jaǵynda jańa ári jaıly «ALMALY» turǵyn aýdanyn salý jóninde sheshim qabyldadyq. Onyń ústine, halyqaralyq jarystarǵa bılet satyp alǵandar arasyndaǵy utys oıyn kezinde bas júlde retinde «ALMALYDAǴY» páterdi usyný aıryqsha mánge ıe bolady dep eseptedik, - deıdi Pavel Belovıch.
Ýnıversıada ótkizilgen soń almatylyqtar jáne «Almalynyń» turǵyndary Almaty Arena muz saraıynda hokkeımen jáne mánerlep syrǵanaýmen qatar, júzý, kórkem gımnastıka, boks, kúres sekildi taǵy da basqa kóptegen sport túrlerimen shuǵyldana alatyn bolady.
Ýnıversıada-2017 oıyndaryna bıletterdi almaty2017.kz, ticketon.kz, kassir.kz, fisutickets.com saıttarynda, sondaı-aq, Almaty jáne Astana qalalarynyń kassalarynda satyp alýǵa bolady. Kassalardyń mekenjaıy týraly kelesi silteme arqyly tolyǵyraq bilýge bolady: https://kassir.kz/universiade/kassy-u
