Ýnıversıadada Qazaqstan qorjynyndaǵy 36 medaldyń jartysyn qyzdarymyz jeńip aldy - Qyryqbaev

Abaı atyndaǵy Opera jáne balet teatrynda ótken saltanatty keshte Baýyrjan Baıbektiń atynan quttyqtaý sóz sóılegen qala ákiminiń orynbasary Arman Qyryqbaev áıel adamdardyń qoǵamdaǵy jetistikterine toqtaldy.
 

«Qazaqstannyń sporttaǵy jetistikterine nazar salyp kórińizder. Mysaly, jaqynda ótken 28-shi Búkilálemdik qysqy ýnıversıadada bizdiń sportshy qyzdarymyz 11 altyn medaldiń 7-eýin, 8 kúmistiń 4-eýin, 17 qola medaldiń 7-eýin Qazaqstan quramasynyń qorjynyn saldy. Sportshylarymyz jeńip alǵan 36 medaldiń jartysy qyzdarymyzdyń arqasynda keldi. Bizdiń qalamyzda negizgi kiris shaǵyn jáne orta bıznesten kelip otyr. Búginde 30 paıyzdan astam kompanııalardy áıelder basqarady. Memlekettik qyzmetshilerdiń «B» korpýsyndaǵy, ıaǵnı Almaty qalasy basshylyǵyndaǵy,  orynbasarlar, bólim basshylarynyń 52 paıyzy áıelder», - dedi Arman Qyryqbaev. 

Sonymen qatar, qala ákiminiń orynbasary óz sózinde Memleket basshysynyń tapsyrmasymen 2017 jyldyń 1 shildesinen bastap, zeınetaqy men bala týýǵa jáne bala kútimine arnalǵan áleýmettik tólemder 20 paıyzǵa arttyrylatyn aıta ketti.

«Bul  bala kútimi men úıde otyrǵan anany áleýmettik qorǵaýǵa jáne kópbalaly otbasylardyń ál-aýqatyn arttyrýǵa jasalǵan naqty qadam. Búginde Almaty qalasy bala týý jaǵynan 3-shi orynda. Jyl saıyn qalamyzda 30 myńdaı náreste jaryq dúnıe esigin ashady. Ótken jyly 330 ana egizderdi, 4 ana úshemdi dúnıege ákeldi», - dedi Arman Qyryqbaev.
 

- Otbasynyń shyraıyn keltirip, otaǵasynyń mereıin asyryp júretin áıelder qoǵamdyq ómirdiń sanı qıly salalarynda da eńbek etip keledi,  - degen Arman Qyryqbaev statıstıkalyq málimetterdi keltirdi.

«Máselen, qalamyzdaǵy birqatar mekemelerdiń basym bóliginiń tizgini búgingi tańda áıel azamattardyń qolynda. Onyń ishinde áıel basshylardyń úlesi bilim berý salasynda  65 paıyz, jyljymaıtyn múlik jáne tamaqtaný salalarynda  40 paıyz, ákimshilik jáne qyzmet kórsetý salalarynda 36 paıyzdan asady. Densaýlyq saqtaý salasyndaǵy qyzmetkerlerdiń 82 paıyzy áıelder, ekonomıka salasyndaǵy qyzmetkerlerdiń 62 paıyzy áıelder. Almaty qalasy boıynsha tirkelgen kásiporyndar basshylarynyń 30 paıyzdan astamy áıel azamattar. Osylaısha, áıelder qoǵam uıytqysy bolyp keledi jáne bul úrdis odan ári de damı bermek.
 

Aıta keteıik, parlamentte 27 paıyz áıelder bolsa, máslıhattar quramyndaǵy depýtattardyń 20 paıyzy áıelder. Qurmetti áıelder qaýymy, búgingideı merekede barshańyzǵa alǵys aıtamyz. Er azamattardyń qamyn oılaǵan sizderge myńda bir alǵys. Eńbekterińiz baıandy bolsyn», - dedi Arman Qyryqbaev.

Saltanatty sharada «MýzART life» toby, QR Eńbek sińirgen qaıratkerleri Mıras pen Quralaı Bekjanovtar, Opera jáne balet teatrynyń solısteri, halyqaralyq baıqaýlardyń jeńimpazdary Alýa Serikhanova, Tamırlan Nurǵalı, Dinmýhamed Joldas, «Vıvat» balalar bı ansambli, «Egiz» gıtarashylar dýeti, «Atman» trıosy, Roman Kım, Saıahat Arashanbaev, «Alan» toby óner kórsetti.