Ýnıversıadada el namysyn qorǵaǵan sportshylardyń alǵashqy legi oraldy
ALMATY. QazAqparat - Taıbeıde ótken Jazǵy Ýnıversıadada el namysyn qorǵaǵan sportshylardyń alǵashqy legi oraldy, dep habarlaıdy QazAqparat tilshisi.
Almaty áýejaıynda sportshylardy jankúıerler, BAQ ókilderi, týysqandary dý qol shapalaqpen qarsy aldy.
Olardyń arasynda Aýyr atletıkadan chempıondar Denıs Ýlanov, Aıdar Qazov, Albert Lınder bar.
«Ýnıversıadada kórsetken ónerime kóńilim tolady. Start boıynsha qarsylastarymdy múlde bilmedim. Biraq, bir oryn alatynyma senimdi boldym», - dedi jazǵy Ýnıversıada oıyndarynyń chempıony, Qazaq Sport jáne týrızm akademııasynyń stýdenti Albert Lınder.
Baıraqty básekede taekvandodan saıysqan Jensel Denız Ýnıversıadadan alǵan tájirıbesimen bólisti.
Túrkııada týǵan qazaq qyzy Jansel Taıbeıde ótken jazǵy ýnıversıadada kúmis júlde ákelgen bolatyn.
«Men fınalda óte myqty qarsylaspen, Azııa chempıonymen shyqtym. Sheshýshi kezeńde basty róldi tájirıbe oınap ketti. Biraq bul aıqasta men ózime kerekti tájirıbe jınaqtadym. Bolashaqta ol meni jeńisterge jeteleıdi dep senemin», - dedi Jansel.
Aıta ketý kerek, Taıbeıde ótken ýnıversıada oıyndarynda taekvandodan erler komandasy erekshe kózge túsip, jalpy esepte 3-orynǵa taban tiredi.
Taıbeıde ótken XXIX jazǵy ýnıversıadada qazaqstandyq ziltemirshiler Denıs Ýlanov (85 kg), Aıdar Qazov (77 kg) , Albert Lınder (69 kg) úzdik shyǵyp, altyn medal alǵan bolatyn.
Jalpy alǵanda Qazaqstan quramasynyń qorjynynda 14 medal, onyń ishinde 3 altyn, 5 kúmis, 6 qola medal bar.
