Ýnıversıadada 5 medal enshilegen shańǵyshy arý Anna Shevchenkoǵa eki bólmeli páter berildi - Pavlodar
ASTANA. QazAqparat - Almatyda ótken qysqy Ýnıversıada oıyndarynyń bes márte júldegeri atanǵan shańǵyshy Anna Shevchenkoǵa Pavlodar oblysynyń ákimi jas sportshylarmen kezdesý kezinde eki bólmeli páterdiń sertfıkatyn tabystady, dep habarlaıdy pavlodarnews.kz.
«Biz sizdiń árbir jarysyńyzdy qarap, jankúıer boldyq. Qazaqstan quramasynyń qorjynyna bes birdeı medal syılap, bárimizdi qýanyshqa bólegenińizge rahmet. Tyǵyz daıyndyq jumystaryna qaramastan, ýaqyt bólip kelgenińiz úshin de alǵys bildiremin», - dedi Bolat Baqaýov.
Anna Shevchenko páter alý óziniń armany ekenin aıtty.
«Búgin taǵy bir armanym oryndaldy. Maǵan qoldaý tanytqanyńyz úshin rahmet. Alǵashqy júldemdi alǵan soń maǵan oblys ákimi habarlasyp jatyr dep tutqany bergen kezde, qaljyń dep oılaǵan edim. Degenmen kóńil súısindirerlik is boldy», - dedi shańǵyshy.
Aıta keteıik, XXVIII qysqy Ýnıversıada oıyndarynda Pavlodar oblysynan 10 sportshy óńir namysyn qorǵap, 11 júlde utyp aldy. Anna Shevchenko úsh qola, bir kúmis jáne bir altyn medal enshilep, bir Ýnıversıadada bes ret tuǵyrǵa shyqqan tuńǵysh qazaqstandyq sportshy atandy.
