Ýnıversıada jáne Azııa chempıonatynyń jeńimpazdary marapattaldy
ASTANA. KAZINFORM — Týrızm jáne sport mınıstri Erbol Myrzabosynov XXXII jazǵy Ýnıversıada men taekvondodan Azııa chempıonatynyń jeńimpazdary men júldegerlerin marapattady, dep habarlaıdy vedomstvonyń baspasóz qyzmeti.
Mınıstr halyqaralyq jarystardyń chempıondary jáne júldegerlerimen kezdesti. Іs-sharaǵa Halyqaralyq taekvondo federatsııasynyń prezıdenti doktor Chýngvon Choý, Qazaqstan taekvondo federatsııasynyń prezıdenti Kýdrát Shamıev, jattyqtyrýshylar men jas sportshylar qatysty.
Quttyqtaý sózinde mınıstr doktor Choýǵa taekvondony jahandyq deńgeıde damytýǵa qosqan úlesi úshin alǵysyn bildirdi.
Erbol Myrzabosynov halyqaralyq syndarda top jarǵan sportshylardy quttyqtap, olardyń jetistikteri búkil eldiń maqtanyshy ekenin atap ótti.
XXXII jazǵy Ýnıversıada chempıony ataǵyn Germanııada Samırhon Ababakırov ıelendi. Malaızııada ótken jasóspirimder arasyndaǵy Azııa chempıonatynda Aıym Serikbaeva, Býned Bahramqulov jáne Arýjan Naımanbaeva altyn medal jeńip aldy. Týrnırdiń úzdik sportshysy dep tanylǵan Aıym Serikbaeva jáne ony daıyndaǵan jeke bapker Erkebulan Ermekálıev mınıstrdiń alǵys hatyn ıelendi. Sonymen qatar, ulttyq quramanyń bas bapkeri Esbol Sultanovqa qazaqstandyq taekvondony damytýǵa qosqan súbeli úlesi men komandamen atqarǵan jemisti eńbegi úshin rızashylyq bildirildi.
— Búgingi tańda memleket sizderdiń ósýińiz úshin barlyq jaǵdaıdy jasap otyr, árqaısyńyzdyń jeke bapkerińiz bar. Búgingi jeńister — kópjyldyq eńbektiń, júıeli daıyndyqtyń jáne óz isine adaldyqtyń nátıjesi. Sizder Qazaqstandy álemdik arenada abyroımen tanytyp júrsizder, — dedi vedomstvo basshysy.
Sportshylarǵa Qurmet gramotalary, alǵys hattar jáne Federatsııanyń sertıfıkattary tabystaldy.
Eske sala keteıik, 14-16 tamyz kúnderi elordadaǵy Jaqsylyq Úshkempirov atyndaǵy Jekpe-jek saraıynda Kazakhstan Open 2025 halyqaralyq reıtıngtik týrnıri ótedi. Jarysqa 22 elden 750-den astam sportshy qatysady dep kútiledi. Olardyń qatarynda Olımpıada chempıondary, álem chempıonattarynyń júldegerleri jáne álemdik reıtıng kóshbasshylary bar. Jarystar úsh jas sanatynda ótedi: jastar, jasóspirimder jáne eresekter.