Ýnıversıada uıymdastyrýshylary reseıliktermen tájirıbe bólisti
ASTANA. QazAqparat - 20-26 mamyr kúnderi Halyqaralyq stýdenttik sport federatsııasynyń (FISU) delegatsııasy Reseı Federatsııasynyń Krasnoıar qalasynda boldy.
Jumys sapary barysynda XXVIII Qysqy Dúnıejúzilik Ýnıversıada-2017 ótkizilý nátıjesi boıynsha Almatydaǵy Qysqy Ýnıversıadanyń uıymdastyrý komıteti ókilderiniń qatysýymen debrıfıng ótkizildi.
Debrıfıng - Qazaqstanda ótken stýdentter oıynynyń nátıjesi boıynsha saraptamalyq pikirler men qurylymdyq usynystarǵa negizdelgen keńes. 2019 jyly Krasnoıarda ótkiziletin Qysqy ýnıversıada oıyndaryna daıyndyq júrgizý jáne ótkizýge uıymdastyrýshylardyń tıimdi tájirıbe jınaý maqsatyn kózdeıdi, deıdi Almaty qalasyndaǵy 28-inshi Qysqy Ýnıversıada-2017-niń daıyndyq jáne ótkizý dırektsııasynyń baspasóz qyzmeti.
FISU Qysqy ýnıversıadalarynyń dırektory Mılan Avgýstın, FISU Qysqy ýnıversıadalarynyń Halyqaralyq tehnıkalyq komıtetiniń tóraǵasy Rodjer Rot, FISU Halyqaralyq medıtsınalyq komıtetiniń tóraǵasy Dýshan Hamar, sondaı-aq Qazaqstandaǵy oıyndarmen aınalysqan "Almaty qalasyndaǵy 2017 jylǵy 28-shi Búkilálemdik Qysqy Ýnıversıadaǵa daıyndalý jáne ótkizý dırektsııasy" MQ dırektorynyń orynbasary Baqytjan Sadyqovtyń basshylyǵymen bir top mamandar komandasy delegatsııa quramyna kirdi.
«Almaty qalasyndaǵy Qysqy Ýnıversıada TMD elderiniń aımaǵyndaǵy jáne táýelsiz Qazaqstannyń tarıhyndaǵy eń iri mýltısporttyq jarystardyń birinshi qysqy stýdenttik oıyndary boldy. FISU baǵalaýy boıynsha, bul Ýnıversıadalardy uıymdastyrýdaǵy tamasha tájirıbe. Jáne búgin biz ózimizdiń tájirıbemizdi reseılik áriptesterimizben bólisýge ázirmiz. Óıtkeni stýdenttik oıyndar - deneshynyqtyrý jáne sport qundylyqtaryn nasıhattaıtyn, sondaı-aq jastar arasyndaǵy salaýatty ómir saltyn júzege asyratyn mańyzdy shara», - dep atap ótti debrıfıng barysynda «Almaty qalasyndaǵy 2017 jylǵy 28-shi Búkilálemdik Qysqy Ýnıversıadaǵa daıyndalý jáne ótkizý dırektsııasy» MQ dırektorynyń orynbasary Baqytjan Sadyqov.
Debrıfıng kezinde Ýnıversıada-2017 Uıymdastyrý komıteti ókilderi Stýdenttik Oıyndardy ótkizý boıynsha barlyq fýnktsıonaldyq baǵyttardy saralady. Atap aıtqanda,«Medıtsınalyq qyzmet», «Nysandardy basqarý», «Sporttyq baǵdarlama», «Marketıng» jáne t.b.
«Biz úshin Ýnıversıada oıyndary qarsańynda debrıfıngtiń ótýi óte mańyzdy. Áriptesterimizben kezdesý iri sporttyq saıystardy uıymdastyrý tájirıbesin úırenýdi, erekshe nazar aýdaratyn tustardy anyqtaýǵa múmkindik beredi. Almatydaǵy 2017 jylǵy Qysqy Ýnıversıadadan biz zor bilim qorymen jáne erekshe sezimmen elimizge oraldyq. Aldaǵy kúnderdegi birlesken jumystar bizge aýqymdy sporttyq oqıǵany daıyndaýǵa kómektesedi. Atalmysh sharany joǵary deńgeıde ótkizý úshin biz barlyq kúshimizdi jumsaımyz», - dedi Krasnoıarsk qalasyndaǵy 2019 jylǵy 29-shy Qysqy Ýnıversıadanyń atqarýshy dırektsııasynyń basshysy Maksım Ýrazov.
