Ýnıversıada sport nysandarynyń ashylýy Almatynyń 1000 jyldyǵyn merekeleýge oraılastyrylady
ALMATY. QazAqparat- Búgin Almaty ákimi Baýyrjan Baıbek 2017 qysqy Ýnıversıada oıyndary ótetin sport nysandaryn aralady. Bul ǵımarattar bolashaqta qala turǵyndarynyń ıgiligine paıdalanylady ári Almatynyń 1000 jyldyǵyn merekeleý qarsańynda esikterin aıqara ashatyn bolady», - dep habarlaıdy Almaty qalasy ákiminiń baspasóz qyzmetinen.
«Ýnıversıada» basshylyǵynyń málimeti boıynsha barlyq sport nysandary 2016 jyldyń 30 tamyzynda paıdalanýǵa beriledi. Qazir teńge baǵamynyń ózgerýine qaramastan qurylys jumystary qarqyndy túrde júrgizilip jatyr jáne belgilengen merzimde aıaqtalady. Mysaly, ústimizdegi jyldyń 22 naýryzynda Medeý aýdanyndaǵy 3000 oryndyq Muz arenasynyń jattyǵý aıdyny daıyn bolady, al 6 shildede negizgi arena men ákimshilik ǵımarattyń qurylysy aıaqtalyp, nysannyń aınalasy abattandyrylady. Bulardan ózge, 12 myń oryndyq Muz saraıynyń ákimshilik ǵımaratynyń, osyndaǵy basseın men jattyǵý muz aıdynynyń qurylys-montaj jumystary tolyq aıaqtalyp, nysannyń negizgi blogy 2016 jyldyń 9 mamyrynda paıdalanýǵa beriledi, al nysannyń aınalasyn abattandyrý jumystary 6 shildede aıaqtalady. Atletter aýylyndaǵy 5 myń oryndyq 4 turǵyn úı 22 naýryzda berilse, taǵy 4 turǵyn úı 9 mamyrda iske qosylady. Al 6 shildede sońǵy 2 turǵyn úıdiń qurylysy aıaqtalady. Bulardyń aınalasyn kógaldandyrý men abattandyrý jumystary 1 tamyzda júzege asady. Barlyq nysandardyń qurylys-montaj jumystary tamyzdyń sońynda aıaqtalyp, bıylǵy jyldyń 30 tamyzynda paıdalanýǵa beriledi. Qurylystyń ár kezeńi Almaty ákimi B. Baıbektiń jeke baqylaýyna alynǵan.
Esterińizge sala keteıik, taıaýda ǵana 12 myń oryndyq Muz saraıynyń kishi arenasynyń, jańa basseınniń, Ýnıversıada sport nysandary men Atletter aýylynyń bıznes-múmkindikteriniń tusaýkeseri ótken bolatyn. Bul sharaǵa qala ákimi Baýyrjan Baıbek, sportshylar, bıznesmender, jýrnalıster, blogerler jáne basqa da múddeli tulǵalar qatysty.
