Ýnıversıada oıyndarynan 200-den astam tikeleı kórsetilim uıymdastyrylady
ASTANA. QazAqparat - 28-shi Búkilálemdik qysqy Ýnıversıada oıyndarynan 200-den astam tikeleı kórsetilim uıymdastyrylady. Bul týraly búgin QR Úkimetiniń selektorlyq rejimdegi otyrysynda elimizdiń Aqparat jáne kommýnıkatsııalar mınıstri Dáýren Abaev málim etti, dep habarlaıdy QazAqparat.
«Árıne, eń basty jumys - jarysty bastan-aıaq sapaly túrde translıatsııalaý. Elimizdiń aýmaǵynda sport básekesin «Habar», «Qazaqstan» jáne «Qazsport» telearnalary taratady. Jalpy, 200-den astam translıatsııa uıymdastyrylatyndyǵy kózdelýde», - dedi mınıstr.
Onyń aıtýynsha, sharanyń resmı host taratýshysy retinde Halyqaralyq ýnıversıtettik sport federatsııasy anyqtalǵan.
«Aıta ketetin másele, Qazaqstan ýnıversıadany ótkizetin el bolǵandyqtan translıatsııalaý quqyǵy otandyq telearnalarǵa tegin beriledi. Tutastaı alǵanda, jarystar 80 elge translıatsııalanyp, 1 mlrd. aýdıtorııany qamtıdy»,- dedi ol.
Sonymen qatar, Abaev Ýnıversıadanyń ashylý jáne jabylý sharalary men sporttyq jarystardyń komentatorlary iriktep alynǵanyn, telearnalarda jarystarǵa arnalǵan kúndelikter kórsetiletindigin, al gazetterde arnaıy better beriletindigin aıtty.
«Jyldyń basty sporttyq sharasy aıaqtalǵannan keıin Ýnıversıadany ótkizý týraly resmı fılm túsirý uıymdastyrylatyn bolady», - dedi mınıstr.
Aıta keteıik, 2017 jyldyń 28 qańtary men 8 aqpany aralyǵynda Almatyda ótetin 28-shi Búkilálemdik qysqy Ýnıversıada oıyndaryna álemniń 59 elinen 2 myńnan astam sportshy qatysady .
Baıraqty básekede el namysyn 168 sportshy qorǵaıtyn bolady .
