Ýnıversıada nysandarynyń der kezinde jáne sapaly salynýy Elbasynyń tikeleı baqylaýyna alyndy - Q. Zákirııanov
ALMATY. QazAqparat - 2017 jylǵy qysqy Ýnıversıadaǵa arnalǵan sport nysandarynyń der kezinde jáne sapaly salynýy Elbasynyń tikeleı baqylaýyna alyndy. Bul týraly búgin Almatyda stýdent-sportshylardyń Qazaqstan halqy Assambleıasynyń QR Prezıdenti saılaýyn kezekten tys ótkizý týraly bastamasyn qoldaýǵa arnalǵan mıtıngisi barysynda Qazaqstannyń ulttyq stýdenttik sport federatsııasynyń prezıdenti Qaırat Zákirııanov málimdedi.
«Keshe ǵana Qazaqstan Respýblıkasy Premer-Mınıstriniń orynbasary Berdibek Saparbaev Ýnıversıadaǵa arnalyp salynyp jatqan sport nysandaryn aralap shyqty jáne olardyń der kezinde jáne sapaly salynýy Elbasynyń tikeleı baqylaýyna alynǵandyǵyn jetkizdi. Nysandardyń qurylysyn tolyq aıaqtaýǵa 100 mlrd. teńge bólinip otyr. Sondyqtan, biz olardyń der kezinde iske qosylatyndyǵyna senimdimiz», - dedi Q. Zákirııanov.
Sonymen qatar, Qazaqstannyń ulttyq stýdenttik sport federatsııasynyń basshysy jastarǵa QR Prezıdenti saılaýyn kezekten tys ótkizýdiń mańyzyn túsindirdi.
«Elbasy Nursultan Nazarbaev únemi jastardyń laıyqty bilim alýyna, sportpen aınalysýyna únemi qamqorlyq jasap kele jatyr. 2017 jylǵy Ýnıversıada da Prezıdenttiń qoldaýymen ótkeli otyr. Biz osy qamqorlyqqa rızashylyǵymyzdy bildire otyryp, elimizde Prezıdent saılaýyn kezekten tys ótkizýdi bir adamdaı qoldaımyz», - dedi Q. Zákirııanov.
