Ýnıversıada: Qazaqstan stýdentter quramasy shaıbaly hokkeıden qola júldeger atandy

ASTANA. QazAqparat - 2023 jylǵy qysqy Ýnıversıadada shaıbaly hokkeıden Kanada stýdentter quramasy chempıon atandy, dep habarlaıdy QazAqparat tilshisi.

Fınaldyq kezdesýde kanadalyq hokkeıshiler AQSh quramasymen kezdesti. Nátıjesinde olar qarsylasyn 7:2 esebimen tize búktirip, chempıondyq tuǵyrǵa kóterildi.

Aıta ketsek, Qazaqstan stýdentter quramasy qola júldeger atandy. Qazaqstandyq hokkeıshiler 3-oryn úshin saıysta Japonııadan 8:1 esebimen basym tústi.

Aıta keteıik, toptyq kezeńde el quramasy Ońtústik Koreıany – 5:1, Vengrııany 9:1, Ulybrıtanııany 15:1, Slovakııany 4:0 esebimen jeńip, AQSh quramasyna 1:4 esebimen ese jiberdi. Al jartylaı fınalda Kanada quramasynan 1:4 esebimen jeńilip qaldy.

Shaıbaly hokkeıden Qazaqstan stýdentter quramasy dúbirli dodaǵa toǵyz márte qatysqan bolatyn. Buǵan deıin 1995 jyly chempıondyq tuǵyrǵa kóterildi, al 1993, 2013, 2015, 2017 jyldarda kúmis, 2007 jyly qola medal ıegeri atandy.