Ýnıversıada: Qazaqstan hokkeıshileri jartylaı fınalda Kanadamen oınaıdy
ASTANA. QazAqparat - 2023 jylǵy Qysqy Ýnıversıadada shaıbaly hokkeıden Qazaqstan stýdentter quramasy jartylaı fınalda Kanadamen kezdesedi, dep habarlaıdy QazAqparat tilshisi.
Qazaqstandyq hokkeıshiler V tobynda Ońtústik Koreıa, Vengrııa, Ulybrıtanııa, Slovakııa jáne AQSh-pen synǵa tústi.
Toptyq kezeńde el quramasy Ońtústik Koreıany – 5:1, Vengrııany 9:1, Ulybrıtanııany 15:1, Slovakııany 4:0 esebimen jeńip, AQSh quramasyna 1:4 esebimen ese jiberdi.
Osylaısha óz tobynda 12 upaımen ekinshi oryn aldy. Birinshi oryn dál sondaı upaı jınaǵan AQSh quramasyna buıyrdy.
Jartylaı fınal 21 qańtarda ótkiziledi. Fınal men 3-oryn úshin saıys 22 qańtarǵa belgilengen.
Shaıbaly hokkeıden Qazaqstan stýdentter quramasy dúbirli dodaǵa toǵyz márte qatysty. 1995 jyly Ispanııanyń Haka qalasynda chempıondyq tuǵyrǵa kóterilse, 1993, 2013, 2015, 2017 jyldarda kúmis, 2007 jyly qola medal ıegeri atandy.
