Ýnıversıada: Qazaqstan hokkeıshileri tórtinshi oryndy qanaǵat tutty
ASTANA. QazAqparat - Reseıdiń Krasnoıar qalasynda ótip jatqan qysqy ýnıversıada oıyndary aıasynda shaıbaly hokkeıden Qazaqstan stýdentter quramasy úshinshi oryn úshin saıysta Kanadadan jeńilip qaldy, dep habarlaıdy QazAqparat tilshisi.
Búgingi kezdesýde Kanada quramasy toptyq kezeńde ketken esesin qaıtardy. Esterińizge sala ketelik, bizdiń jigitter ol joly atalmysh qarsylasyn 4:3 esebimen tize búktirgen edi. Odan buryn qazaqstandyq hokkeıshiler Latvııany 10:1 esebimen jeńse, odan keıin Shvetsııadan 5:1, Ulybrıtanııadan 17:1, Shveıtsarııadan 7:0 esebimen basym tústi. Al jartylaı fınalda Slovakııadan 0;4 esebimen jeńilip qaldy.
Kanada stýdentter quramasy bizdiń qaqpaǵa jaýapsyz úsh shaıba soqty. Esep 26-mınýta ashyldy. Kanada sapynan Aıdan Aleksandr Ýollas óz quramasyn alǵa shyǵardy. Kelesi shaıba arada bir mınýt ótkende taǵy da bizdiń qaqpadan tabyldy. Oıynnyń 27-mınýtynda kanadalyq Danıel Patrık Del Padjo mergendik tanytty. Qorytyndy esep kezdesýdiń bitýine 38-sekýnd qalǵanda belgili boldy. Ony Stefan Anderson Harper soqty. Osylaısha Kanada jastary bizdiń jigitterden 3:0 esebimen basym tústi.
Qazaqstan stýdentter quramasy 1995 jyly qysqy Ýnıversıadanyń altynyna qol jetkizgen edi. Úsh márte aqtyq synǵa deıin jetip, 2013 jyly Kanadaǵa, 2015 jáne 2012 jyldary Reseıge jol berip qoıdy. Al 2007 jyly bizdiń qurama qola júldege qol sozǵan bolatyn.
