Ýnıversıada: Qazaqstan hokkeıshileri AQSh quramasynan jeńilip qaldy

ASTANA. QazAqparat - 2023 jylǵy Qysqy Ýnıversıadada shaıbaly hokkeıden Qazaqstan stýdentter quramasy besinshi oıynyn AQSh-qa qarsy ótkizdi, dep habarlaıdy QazAqparat tilshisi.

Tórt týrdan keıin qazaqstandyq hokkeıshiler týrnır kestesinde kósh basynda turǵan edi. Al amerıkandyq qurama úshinshi týrda Slovakııa hokkeıshilerine 2:5 esebimen ese jiberdi. Osyǵan baılanysty olar jarystyń pleı-off satysyna shyǵý úshin oıynnyń negizgi kezeńinde jeńiske jetýi tıis boldy.

Kezdesý barysynda amerıkandyq Hanıýoll Mettıý 1-mınýtta esep ashqan edi. Oǵan 4-mınýtta qazaqstandyq Batyrlan Muratov bir golmen jaýap qaıyrdy.

Odan keıin amerıkandyq hokkeıshiler qatarynan úsh shaıba soǵyp ketti.

Osylaısha Qazaqstan quramasy qarsylasyna 1:4 esebimen ese jiberdi.

Aıta ketsek, qazaqstandyq hokkeıshiler V tobynda Ońtústik Koreıa, Vengrııa, Ulybrıtanııa, Slovakııa jáne AQSh-pen synǵa tústi. Buǵan deıin olar 12 qańtarda Ońtústik Koreıany – 5:1, odan keıin Vengrııany – 9:1, Ulybrıtanııany 15:1, Slovakııany 4:0 esebimen jeńdi.

Foto: sports.kz