Ýnıversıada alaýy Shymkentti de aralap shyqty
ASTANA. QazAqparat - Búgin ońtústikqazaqstandyqtar Búkilálemdik 28 qysqy «Ýnıversıada-2017» alaý estafetasyn qabyldady, dep habarlaıdy OQO ákiminiń baspasóz qyzmeti.
Shymkent qalasynyń Ál-Farabı alańynda «Alaý estafetasynyń» saltanatty ashylý rásimine qatysqan oblys ákimi Janseıit Túımebaev barsha jurtshylyq pen sport súıer qaýymdy Táýelsiz qazaqstannyń tarıhynda tuńǵysh ret ótip jatqan Dúnıejúzilik qysqy stýdentter oıynymen jáne «Alaý estafetasynyń» kelýimen quttyqtady.
«Bizge eń aýqymdy halyqaralyq sport oqıǵalarynyń biri - 28-shi Búkilálemdik qysqy Ýnıversıadanyń belsendi qatysýshylary bolý baqyty buıyrdy. Óz egemendiginiń 25 jylynda álem tańdanatyn elge aınalý Elbasynyń eren eńbegi ekendigi anyq. Tuńǵysh Prezıdentimizdiń Qazaq memleketin halyqaralyq qaýymdastyqtyń aldynda senimdi serik, aınymas áripteske aınaldyra bildi», - dedi ákim. 
Elimizdiń namysyn qorǵaıtyn sportshylardyń ishinde ońtústikqazaqstandyq 5 sportshy bar. Olar frıstaıl sport túrinen Aldabergenova Janbota, Arapbaeva Jibek, Qalmurzaeva Aqmarjan, Іńkárbek Baǵlan, Muhamedjanov Darhan sııaqty sportshylar. Jerlesterimizge barlyǵymyz qoldaý bildire otyryp, sáttilik, al qala turǵyndary men qonaqtaryna qyzyqty sporttyq mereke tileımiz,- dedi alaýǵa qatysýshylar.
Ýnıversıada Alaýyn oblys ákimi J.Túımebaev jaǵyp, birshama qashyqtyqta alyp júrgen soń, QR Eńbek sińirgen sport sheberi, «Qurmet» ordeniniń ıegeri Álııa ıÝsýpovaǵa tabystady.
Ýnıversıada alaýyn Álemge belgili sportshylarymyz ben 12 joǵarǵy oqý ornynyń stýdentterinen quralǵan jalpy 60 alaýger Shymkent qalasynyń basty kóshelerimen ıaǵnı, 12 shaqyrym joldy basyp ótpek. Eki kezeńnen ótetin estafeta «Naýryz» alańynda márege jetedi. Jalpy sharaǵa ońtústikqazaqstandyq 6 myń adam qatysty.
Alaýgerlerdiń qatarynda aýyr atletıkadan QR eńbegi sińgen sport sheberi, Rıo Olımpıadasynyń kúmis júldegeri, «Qurmet» ordeniniń ıegeri Jazıra Japparqul, kórkem gımnastıkadan halyqaralyq dárejedegi sport sheberi, QR birneshe dúrkin chempıony, birneshe halyqaralyq jarystardyń jeńimpazy, Rıo Olımpıadasynyń eń jas qatysýshysy Sábına Áshirbaeva, karate-dodan halyqaralyq dárejedegi sport sheberi, QR birneshe dúrkin chempıony, 2016 jylǵy jastar arasyndaǵy Álem chempıony Qaısar Alpysbaı, bokstan halyqaralyq dárejedegi sport sheberi, QR birneshe dúrkin chempıony, 2014 jylǵy jastar arasyndaǵy Álem chempıony Shalqar Aıhymbaı, kıkboksıngten QR sport sheberi, Álemniń 2 dúrkin chempıony Aslı Azızova syndy úzdikter bar. Sonymen birge, Álemge belgili sportshylarymyz, QR eńbegi sińgen sport sheberleri Muhtarhan Dildábekov, Myrzaǵalı Aıtjanov, Álııa ıÝsýpova, Andreı Makarov, Birjan Jaqypov, Muratbek Qypshaqbaevtar da alaýgerlerdiń qatarynda.
Alaýgerlermen birge búginde jasy 80-nen asqan sport ardageri, KSRO-nyń sport sheberi, QR eńbegi sińgen jattyqtyrýshysy, QR balalar fýtbol qaýymdastyǵynyń Qurmetti tóraǵasy, oblystyń Qurmetti azamaty Mahambet Baımyrzauly Saparbaev ta júr.
2017 jyldyń 29 qańtar men 8 aqpan aralyǵynda Almaty qalasynda egemendi Qazaqstanda XXVIII Búkilálemdik qysqy stýdenttik oıyndar ótedi. Atalǵan jarysqa 50 elden 5000-nan astam stýdentter qatysady dep kútilýde.
Ýnıversıada Qazaqstan Respýblıkasynyń ulttyq jobasy jáne elimizdiń 25 jyldyq tarıhyndaǵy eń iri mýltısporttyq is-shara bolyp tabylady. Ýnıversıadaǵa Qazaqstan sporttyń 13 túrinen qatysady.
