Ýnıversıada-2019: Narıman Kýrbanov sporttyq gımnastıkadan kúmis júldeger atandy
NUR-SULTAN. QazAqparat - Italııanyń Neapol qalasynda ótip jatqan jazǵy Ýnıversıada oıyndarynda Qazaqstan qorjynyna úshinshi medal tústi. Narıman Kýrbanov gımnastıkalyq at snarıadyndaǵy jattyǵýdan kúmis júldeger atandy, dep habarlaıdy Olympic.kz.
Narıman irikteý kezeńin úshinshi orynmen aıaqtaǵan bolatyn. Fınalda ol 14.700 upaı jınap, kúmiske qol jetkizdi. Altyn medal 15.400 upaımen toptan qara úzip ketken taıpeılik Lı Chı Kaıdyń enshisinde. Qola júldeni 14.500 upaı jınaǵan japonııalyq Kaıa Kazıýma ıelendi.
Eske sala keteıik, keshe sporttyq gımnastıkadan kópsaıys boıynsha jeńimpazdar men júldegerler anyqtaldy. Qazaqstandyq Mılad Karımı besinshi orynǵa taban tiredi.
