Ýnıversıada-2019: Qazaqstandyq gımnastar fınalǵa ótti
NUR-SULTAN. QazAqparat - Italııanyń Neapol qalasynda bastalǵan jazǵy Ýnıversıada oıyndarynda sporttyq gımnastıkadan irikteý kezeńi aıaqtaldy, dep habarlaıdy QazAqparat Olympic.kz saıtyna silteme jasap.
Іrikteý synynyń qorytyndysy boıynsha, bizdiń gımnastar bes jattyǵý túrinen fınalǵa joldama aldy. Atap aıtar bolsaq, komanda úzdigi Mılad Karımı kópsaıys qorytyndysy boıynsha 8-shi oryn alyp, aqtyq synǵa ótti. Sondaı-aq, Mılad erkin jattyǵýda - tórtinshi, gımnastıkalyq kermede - altynshy, gımnastıkalyq qossyryqta jetinshi orynnan kórinip, fınalda óner kórsetý múmkindigin aldy.
Komanda múshesi Narıman Kýrbanov gımnastıkalyq at snarıadyndaǵy irikteý kezeńin úshinshi orynmen aıaqtady. Narıman da fınalda synǵa túsetin sportshylar qatarynda.
Sporttyq gımnastıkadan Ýnıversıadanyń fınaldyq kezeńi 6-7 shildede ótedi. 6 shilde kúni kópsaıystan, 7 shilde kúni jekelegen jattyǵý túrlerinen jeńimpazdar men júldegerler anyqtalady.
5 shilde kúni Aıda Baýyrjanova men Ekaterına Chýıkına jarysty bastaıdy.
